കൊച്ചി: നിയമ വിദ്യാർത്ഥിനി മോഫിയ ആത്മഹത്യ ചെയ്ത സംഭവത്തിൽ ആരോപണ വിധേയനായ ആലുവ സി ഐ സുധീറിനെതിരെ കൂടുതൽ പരാതികൾ. ആലുവ പൊലീസ് സ്‌റ്റേഷനിൽ ഗാർഹിക പീഡന പരാതിയുമായെത്തിയ യുവതിയാണ് സി ഐയിൽ നിന്ന് നേരിട്ട മോശം അനുഭവത്തെക്കുറിച്ച് വെളിപ്പെടുത്തിയത്.

താൻ പരാതി നൽകിയിട്ടും സി ഐ മൊഴിയെടുക്കാനോ എഫ് ഐ ആർ രജിസ്റ്റർ ചെയ്യാനോ തയ്യാറായില്ലെന്നും മണിക്കൂറുകൾക്ക് ശേഷം വിരട്ടിയോടിച്ചെന്നും യുവതി ഒരു സ്വകാര്യ ചാനലിനോട് പറഞ്ഞു. കഴിഞ്ഞ ശനിയാഴ്ച വൈകിട്ടാണ് പരാതി നൽകാൻ പൊലീസ് സ്റ്റേഷനിലേക്ക് പോയത്.

മണിക്കൂറുകളോളം സ്‌റ്റേഷനിൽ ഇരുത്തിയിട്ട് അവസാനം വിരട്ടിയോടിക്കുകയായിരുന്നെന്ന് യുവതി ആരോപിക്കുന്നു. എടീ എന്നാണ് സി ഐ വിളിച്ചിരുന്നതെന്നും യുവതി പറയുന്നു. താൻ നൽകിയ പരാതിയിൽ പിന്നീട് മൊഴി രേഖപ്പെടുത്തി, എന്നാൽ എഫ് ഐ ആർ രജിസ്റ്റർ ചെയ്ത് അതിന്റെ പകർപ്പ് നൽകണമെന്ന് ആവശ്യപ്പെട്ടപ്പോൾ അതൊന്നും പറ്റില്ലെന്നായിരുന്നു സി ഐയുടെ മറുപടിയെന്നും യുവതി വെളിപ്പെടുത്തി.

പിറ്റേദിവസം സ്റ്റേഷനിൽ പോയപ്പോൾ മോഫിയയെ കണ്ടു. ഏറെ ദു:ഖത്തോടെയാണ് മോഫിയ സ്റ്റേഷനകത്തേക്ക് പോയത്. അതിനെക്കാളേറെ വിഷമത്തിലാണ് തിരിച്ചിറങ്ങിവന്നതെന്നും യുവതി വെളിപ്പെടുത്തി. പരാതി നൽകാൻ ചെന്നപ്പോൾ വനിതാ പൊലീസിന്റെ സാന്നിദ്ധ്യം ഉണ്ടായിരുന്നില്ലെന്നും ഇവർ ആരോപിക്കുന്നു.

കൊല്ലത്തെ ഉത്ര വധക്കേസിൽ പ്രാഥമിക ഘട്ടത്തിലെ തെളിവ് ശേഖരണത്തിൽ സി ഐ വീഴ്ചവരുത്തിയെന്ന് റൂറൽ എസ് പിയുടെ അന്വേഷണ റിപ്പോർട്ട് പുറത്തുവന്നിരുന്നു. കൂടാതെ അഞ്ചൽ സ്റ്റേഷനിൽ പരാതി നൽകാനെത്തിയ അന്യസംസ്ഥാന തൊഴിലാളിയെ കൊണ്ട് സി ഐ സ്റ്റേഷനിൽ പണിയെടുപ്പിച്ചെന്നും ആരോപണമുണ്ടായിരുന്നു.