ന്യൂ‌‌ഡൽഹി: ലോകത്ത് പല നഗരങ്ങളിലും ജീവിത ചെലവ് കൂടുതലാണെന്ന് പറഞ്ഞ് കേൾക്കാറുണ്ട്. ഇപ്പോഴിതാ വിവിധ നഗരങ്ങളുടെ ജീവിത ചെലവ് സൂചിപ്പിക്കുന്ന പട്ടിക പുറത്ത് വിട്ടിരിക്കുകയാണ് ഇക്കണോമിസ്റ്റ് മാസികയുടെ ഗവേഷണ വിഭാഗമായ ഇക്കണോമിസ്റ്റ് ഇന്റലിജൻസ് യൂണിറ്റ്. ഈ പട്ടിക പ്രകാരം ഇസ്രയേലിയൻ നഗരമായ ടെൽ അവീവ് ആണ് ലോകത്തിലെ ഏറ്റവും ചെലവേറിയ നഗരം.

ഇസ്രയേലിന്റെ നാണയമായ ഷെക്കെലും ഡോളറുമായുള്ള താരതമ്യത്തിൽ ഷെക്കെൽ കൂടുതൽ മൂല്യം നേടിയതാണ് ടെൽ അവീവ് ഒന്നാം സ്ഥാനത്ത് എത്താനുള്ള പ്രധാന കാരണങ്ങളിൽ ഒന്നായി സൂചിപ്പിക്കുന്നത്. മാത്രവുമല്ല കൊവിഡ് സാഹചര്യത്തിൽ നിത്യോപയോഗ സാധനങ്ങളുടെ വില വർദ്ധനവും ഗതാഗത സംവിധാനങ്ങളിൽ ഉണ്ടായ പുരോഗതിയുമെല്ലാം ഇതിന് കാരണമായി പഠനം സൂചിപ്പിക്കുന്നുണ്ട്. കഴിഞ്ഞ തവണ ഒന്നാം സ്ഥാനത്ത് ഉണ്ടായിരുന്ന പാരീസിനെ പിന്നിലാക്കികൊണ്ടാണ് ടെൽ അവീവ് ഇത്തവണ ഒന്നാം സ്ഥാനത്ത് എത്തിയത്.

ഈ പട്ടിക പ്രകാരം ഏറ്റവും ചെലവ് കുറഞ്ഞ നഗരങ്ങളുടെ പട്ടികയും ഇഐയു പുറത്ത് വിട്ടിട്ടുണ്ട്. ഈ പട്ടിക പ്രകാരം സിറിയൻ തലസ്ഥാനമായ ഡമാസ്കസിനും ലിബിയൻ തലസ്ഥാനമായ ട്രിപ്പോളിക്കയുമാണ് ചെലവ് കുറഞ്ഞ നഗരങ്ങളിൽ മുന്നിൽ. ഏറ്റവും ചെലവ് കുറഞ്ഞ ഏഴാമത്തെ നഗരം അഹമ്മദാബാദാണ്. ആറാം സ്ഥാനത്തായി പാക് നഗരമായ കറാച്ചിയുമുണ്ട്. അഞ്ച് വൻകരകളിലെ 173 നഗരങ്ങളിലാണ് പഠനം നടന്നത്.