ഇതര ഭാഷകളിലെ വമ്പൻ ചിത്രങ്ങളും ഒപ്പം മലയാളത്തിലെ യുവ സൂപ്പർ താരങ്ങളുടെ ചിത്രങ്ങളും. തിയേറ്ററുകളിലെത്തുന്നത് ഒരു ഡസനിലധികം സിനിമകൾ. പുതുവർഷാരംഭത്തിൽത്തന്നെ വെള്ളിത്തിരയിലരങ്ങേറാനൊരുങ്ങുന്നത് തീ പാറുന്ന പോരാട്ടം.
ജനുവരി ഏഴിനാണ് ആദ്യ റിലീസുകളെത്തുക. ബാഹുബലി സിരീസിനുശേഷം രാജമൗലി ഒരുക്കുന്ന ആർ.ആർ.ആർ, നിവിൻ പോളിയെ നായകനാക്കി രാജീവ് രവി സംവിധാനം ചെയ്യുന്ന തുറമുഖം, തണ്ണീർ മത്തൻ ദിനങ്ങൾക്കുശേഷം ഗിരീഷ് എ.ഡി സംവിധാനം ചെയ്യുന്ന സൂപ്പർ ശരണ്യ, നവാഗതനായ അഖിൽ മാരാർ സംവിധാനം ചെയ്യുന്ന ഒരു താത്വിക അവലോകനം എന്നീ ചിത്രങ്ങളാണ് ജനുവരി ഏഴിന് തിയേറ്ററുകളിലെത്തുന്നത്.
ആർ.ആർ. ആറിന്റെ
കേരളാ റൈറ്റിന് 10 കോടി
എച്ച്.ആർ. പിക്ചേഴ്സിന്റെ ബാനറിൽ റിയ ഷിബുവാണ് ആർ.ആർ.ആർ കേരളത്തിലെത്തി
ക്കുന്നത്. 10 കോടി രൂപയ്ക്കാണ് ചിത്രത്തിന്റെ കേരളാ റൈറ്റ് വിറ്റ് പോയതെന്നാണ് വിവരം.ജൂനിയർ എൻ.ടി. ആറും രാം ചരൺ തേജയും നായകന്മാരാകുന്ന ചിത്രത്തിൽ ആലിയ ഭട്ടാണ് നായിക. അജയ് ദേവ്ഗൺ ഒരു സുപ്രധാന വേഷം അവതരിപ്പിക്കുന്നു.
നിവിൻ പോളിക്കൊപ്പം നിമിഷ സജയൻ, ഇന്ദ്രജിത്ത്, ജോജു ജോർജ്, അർജുൻ അശോകൻ, സുദേവ് നായർ, മണികണ്ഠൻ ആർ.ആചാരി, ദർശന രാജേന്ദ്രൻ, പൂർണ്ണിമ ഇന്ദ്രജിത്ത്, സെന്തിൽ കൃഷ്ണ തുടങ്ങിയവർ വേഷമിടുന്ന തുറമുഖം നിർമ്മിക്കുന്നത് തെക്കേപ്പാട്ട് ഫിലിംസിന്റെ ബാനറിൽ സുകുമാർ തെക്കേപ്പാട്ടാണ്. രാജീവ് രവി തന്നെയാണ് തുറമുഖത്തിന്റെ ഛായാഗ്രഹണം നിർവഹിക്കുന്നതും. ഗോപൻ ചിദംബരത്തിന്റേതാണ് രചന.
അർജുൻ അശോകൻ, അനശ്വര രാജൻ, മമിത, ബൈജു എന്നിവരാണ് സൂപ്പർ ശരണ്യയിലെ പ്രധാന അഭിനേതാക്കൾ.
രാഷ്ട്രീയ ആക്ഷേപ ഹാസ്യ ചിത്രമായ ഒരു താത്വിക അവലോകനത്തിൽ ജോജു ജോർജ്, നിരജ് രാജു, അജു വർഗീസ്, ഷമ്മി തിലകൻ, ജയകൃഷ്ണൻ, മൻരാജ്, മേജർ രവി, പ്രേംകുമാർ, ബാലാജി ശർമ്മ, മാമുക്കോയ, നന്ദൻ ഉണ്ണി എന്നിവരാണ് പ്രധാന വേഷങ്ങൾ അവതരിപ്പിക്കുന്നത്.
പതിനാലിന് താരപ്പോര്
മലയാളത്തിന്റെ യുവ സൂപ്പർ താരം ദുർഖർ സൽമാന്റെ സല്യൂട്ട്, തമിഴകത്തിന്റെ `തല` അജിത്ത് നായകനാകുന്ന വലിമൈ, ബാഹുബലി സീരീസിലൂടെ ഗ്ളോബൽ സ്റ്റാറായി മാറിയ പ്രഭാസ് നായകനാകുന്ന രാധേ ശ്യാം. ജനുവരി 14 ന് പ്രേക്ഷകരെ കാത്തിരിക്കുന്നത് ആവേശപ്പോരാട്ടത്തിന്റെ വിസ്മയക്കാഴ്ച.
ഈ വർഷത്തെ ഏറ്റവും വലിയ ഹിറ്റായ കുറുപ്പിന് ശേഷം തിയേറ്ററുകളിലെത്തുന്ന ദുൽഖർ ചിത്രമെന്ന നിലയിൽ സല്യൂട്ടിനെക്കുറിച്ചുള്ള പ്രതീക്ഷകൾ വാനോളം. റോഷൻ ആൻഡ്രൂസ് -ബോബി സഞ്ജയ് ടീമൊരുക്കുന്ന ചിത്രത്തിൽ ദുൽഖർ ആദ്യമായി മുഴുനീള പൊലീസ് വേഷത്തിൽ പ്രത്യക്ഷപ്പെടുന്നുവെന്ന പ്രത്യേകതയുമുണ്ട്. എം. സ്റ്റാർ ക്രിയേഷൻസുമായി ചേർന്ന് ദുൽഖറിന്റെ വേ ഫെയറർ ഫിലിംസാണ് നിർമ്മാണം.
ധീരൻ അധികാരം ഒൻട്ര്, ഹിന്ദിചിത്രമായ പിങ്കിന്റെ റീമേക്ക് നേർ കൊണ്ട പാർവ്വെ എന്നീ ചിത്രങ്ങളൊരുക്കിയ എച്ച്. വിനോദ് സംവിധാനം ചെയ്യുന്ന ആക്ഷൻ ത്രില്ലറായ വലിമൈ നിർമ്മിക്കുന്നത് ബോണി കപൂറാണ്. സീ സ്റ്റുഡിയോസാണ് സഹ നിർമ്മാതാക്കൾ. ഹിമ ബുറേഷിയാണ് നായിക. യുവൻ ശങ്കർ രാജ സംഗീത സംവിധാനം നിർവഹിക്കുന്നു.
രാധാകൃഷ്ണ കുമാർ സംവിധാനം ചെയ്യുന്ന സയൻസ് ഫിക്ഷൻ - റൊമാന്റിക്ക് ഡ്രാമയായ രാധേ ശ്യാമിൽ പ്രഭാസിന്റെ നായികയാകുന്നത് പൂജ ഹെഗ്ഡേയാണ്. ടി. സീരീസുമായി ചേർന്ന് ഗോപി കൃഷ്ണ മൂവീസ് നിർമ്മിക്കുന്ന ചിത്രത്തിന്റെ ഛായാഗ്രഹണം നിർവഹിക്കുന്നത് മനോജ് പരമഹംസയാണ്.
പ്രണവും ടൊവിനോയും
നേർക്കുനേർ
പ്രണവ് മോഹൻ ലാലിനെ നായകനാക്കി വിനീത് ശ്രീനിവാസൻ സംവിധാനം ചെയ്യുന്ന ഹൃദയവും ടൊവിനോ തോമസിനെ നായകനാക്കി ആഷിഷ് അബു സംവിധാനം ചെയ്യുന്ന നാരദനും ജനുവരി 21 ന് തിയേറ്ററുകളിലെത്തുന്നു.
മലയാള സിനിമയിലെ ആദ്യകാല ബാനറുകളിലൊന്നായ മെരിലാൻഡ് സിനിമാസിന് വേണ്ടി വിശാഖ് സുബ്രഹ്മണ്യം നിർമ്മിക്കുന്ന ഹൃദയത്തിൽ കല്യാണി പ്രിയദർശനും ദർശന രാജേന്ദ്രനുമാണ് നായികമാർ. പതിനഞ്ച് പാട്ടുകളുണ്ട് ചിത്രത്തിൽ. ഹിഷാം അബ്ദുൽ വഹാബാണ് സംഗീത സംവിധായകൻ, പ്രണവ് മോഹൻലാലിന് ബ്രേക്കാകുമെന്ന് പ്രതീക്ഷിക്കപ്പെടുന്ന ചിത്രത്തിലെ ദർശനാ.... എന്ന് തുടങ്ങുന്ന പാട്ട് ട്രെൻഡിംഗ് ലിസ്റ്റിൽ ഇടം നേടിയിരുന്നു.
ഉണ്ണി. ആറിന്റെ രചനയിൽ ആഷിക്ക് അബു സംവിധാനം ചെയ്യുന്ന നാരദനിൽ അന്ന ബെന്നാണ് ടൊവിനോയുടെ നായികയാകുന്നത്. ഷറഫുദ്ദീനാണ് മറ്റൊരു പ്രധാന താരം. ശേഖർ മേനോന്റേതാണ് സംഗീതം. ആഷിക്ക് അബു തന്നെയാണ് ചിത്രത്തിന്റെ നിർമ്മാതാവും.
നവാഗതനായ ശരത് രചനയും സംവിധാനവും നിർവഹിച്ച് ഷെയ്ൻ നിഗം, ഷൈൻ ടോം ചാക്കോ, ശ്രീരേഖ, സോനാ ഒലിക്കൽ എന്നിവർ പ്രധാന വേഷങ്ങളവതരിപ്പിക്കുന്ന വെയിൽ നിർമ്മിക്കുന്നത് ഗുഡ്വിൽ എന്റർടെയ്ൻമെന്റ്സിന്റെ ബാനറിൽ ജോബി ജോർജാണ്. വിനായക് ശശികുമാറിന്റെയും അർവർ അലിയുടെയും വരികൾക്ക് പ്രദീപ് കുമാർ സംഗീത സംവിധാനം നിർവഹിക്കുന്നു. ഷാസ് മുഹമ്മദാണ് ഛായാഗ്രഹണം. സൈജു കുറുപ്പ്, ശബരീഷ് വർമ്മ, സിജു വിൽസൺ എന്നിവർ പ്രധാന വേഷങ്ങളവതരിപ്പിക്കുന്ന ഉപചാര പൂർവം, ഗുണ്ടാജയൻ സംവിധാനം ചെയ്യുന്നത് അരുൺ വൈഗയാണ്. രാജേഷ് വർമ്മയുടേതാണ് രചന. ദുൽഖർ സൽമാന്റെ നിർമ്മാണ വിതരണക്കമ്പനിയായ വേ ഫെയറർ ഫിലിംസാണ് ചിത്രം തിയേറ്ററുകളിലെത്തിക്കുന്നത്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |