കൊൽക്കത്ത : പശ്ചിമ ബംഗാളിൽ കൊവിഡ് രോഗികൾക്കായി പഴക്കൂടകളുടെ വിതരണം ആരംഭിച്ച് മമത ബാനർജി സർക്കാർ. ' വേഗം സുഖം പ്രാപിക്കട്ടെ " എന്ന മുഖ്യമന്ത്രിയുടെ സന്ദേശത്തോടൊപ്പമാണ് സർക്കാർ പഴക്കൂടകൾ കൊവിഡ് രോഗികൾക്ക് അയച്ചുകൊടുക്കുന്നത്.

ഇതുവരെ ഏകദേശം 10,000 പഴക്കൂടകൾ തയാറാക്കുകയും കൊൽക്കത്തയിലുടനീളം അവയുടെ വിതരണം ആരംഭിക്കുകയും ചെയ്തു. സന്ദേശത്തിനൊപ്പം പഴക്കൂടകൾ വിതരണം ചെയ്യാനുള്ള ചുമതല കൗൺസിലർമാർക്കാണ് നൽകിയിരിക്കുന്നത്.

ഇവർ കൊവിഡ് രോഗികളുള്ള വീടുകളിലെത്തി ഇവ വിതരണം ചെയ്യുകയാണ്. കൊവിഡ് കേസുകൾ കൂടുതലുള്ള ഇടങ്ങളിൽ പഴക്കൂടകൾ അടങ്ങിയ പാക്കുകൾ വീടുകൾക്കോ കെട്ടിടങ്ങൾക്കോ പുറത്ത് എത്തിക്കുകയും താമസക്കാരെ ഫോണിൽ വിളിച്ച് അറിയിക്കുകയും ചെയ്യും.