കൊച്ചി: നീതിക്കായി പോരാട്ടം തുടരുമെന്ന് വ്യക്തമാക്കിയ നടിക്ക് ഐക്യദാർഢ്യവുമായി മോഹൻലാലും മമ്മൂട്ടിയുമുൾപ്പെടെയുള്ള നിരവധി സിനിമാപ്രവർത്തകർ സമൂഹമാദ്ധ്യമങ്ങളിൽ പോസ്റ്റിട്ടു. അതിക്രമത്തിന് ശേഷം അഞ്ചുവർഷം അനുഭവിച്ച വേദനയും ഒപ്പം നിന്നവർക്ക് നന്ദിയും അറിയിച്ചാണ് നടി ഫേസ്ബുക്കിൽ കുറിപ്പിട്ടത്. 'ബഹുമാനിക്കുന്നു" എന്ന കമന്റോടെ മോഹൻലാലും 'നിങ്ങൾക്കൊപ്പം" എന്നു വ്യക്തമാക്കി മമ്മൂട്ടിയും നടിയുടെ പോസ്റ്റ് സ്വന്തം സമൂഹമാദ്ധ്യമ അക്കൗണ്ടുകളിൽ ഷെയർ ചെയ്തു. മഞ്ജുവാര്യർ, പൃഥ്വിരാജ്, ടൊവിനോ തോമസ്, ദുൽഖർ സൽമാൻ, കുഞ്ചാക്കോ ബോബൻ, നിമിഷ സജയൻ, അന്ന ബെൻ, റിമ കല്ലിങ്കൽ, അഞ്ജലി മേനോൻ, ആഷിക് അബു, നീരജ് മാധവൻ, സാന്ദ്ര തോമസ്, സംയുക്ത മേനോൻ തുടങ്ങിയവർ ഐക്യദാർഢ്യം അറിയിച്ചു.

സിനിമയിലെ വനിതാ കൂട്ടായ്മയും ഇരയുടെ പോസ്റ്റ് പങ്കിട്ടു. നൂറുകണക്കിന് സാധാരണക്കാരും പിന്തുണച്ച് രംഗത്തെത്തി.