തിരുവനന്തപുരം: സിൽവർ ലൈൻ പദ്ധതിയുടെ നേട്ടങ്ങളെക്കുറിച്ച് ജനങ്ങളെ ബോധവത്കരിക്കാൻ 36 പേജുകളുള്ള 50 ലക്ഷം കൈപ്പുസ്തകങ്ങൾ സർക്കാ‌ർ പുറത്തിറക്കും. ഇതിനായി പി.ആർ.ഡി ടെൻഡർ വിളിച്ചു. പദ്ധതിയെക്കുറിച്ച് വ്യാപകമായി എതിർപ്പുയരുന്ന പശ്ചാത്തലത്തിലാണ് 'സിൽവർ ലൈൻ അറിയേണ്ടതെല്ലാം' എന്ന പേരിൽ സർക്കാ‌ർ കൈപ്പുസ്തകം ഇറക്കുന്നത്.

ആധുനിക സൗകര്യമുള്ള അച്ചടിശാലകളിൽ നിന്നാണ് ടെൻഡർ ക്ഷണിച്ചിരിക്കുന്നത്.

കേരളത്തിനകത്ത് ആസ്ഥാന ഓഫീസും സ്വന്തമായി പ്റസുമുള്ള സ്ഥാപനത്തെയാണ് പരിഗണിക്കുന്നത്. ജനുവരി 28 ആണ് ഇ- ടെൻഡർ സ്വീകരിക്കുന്ന അവസാന തീയതി. പദ്ധതിയെക്കുറിച്ച് വിശദീകരിക്കാൻ ജില്ലകളിൽ പൗരപ്രമുഖന്മാരുമായി മുഖ്യമന്ത്രി കൂടിക്കാഴ്ച നടത്തുന്നുണ്ട്. വീടുകളിലെത്തി പദ്ധതിയെക്കുറിച്ച് പ്രചരിപ്പിക്കാൻ ലഘുലേഖകളുമായി സി.പി.എം പ്രവർത്തകർ രംഗത്തുണ്ട്.