ദുബായ്: ഇന്റർനാഷണൽ ക്രിക്കറ്റ് കൗൺസിലിന്റെ 2021ലെ ഏറ്റവും മികച്ച പുരുഷ ട്വന്റി-20 താരമായി പാക് വിക്കറ്റ് കീപ്പർ ബാറ്റർ മൊഹമ്മദ് റിസ്‌വാനേയും വനിതാ താരമായി ഇംഗ്ലണ്ടിന്റെ ടാമി ബ്യൂമോണ്ടിനേയും തിരഞ്ഞെടുത്തു. കഴിഞ്ഞ വർഷം 29 അന്താരാഷ്ട്ര ട്വന്റി-20 മത്സരങ്ങളിൽ നിന്നായി 73.66 ശരാശരിയിൽ 1 സെഞ്ച്വറി ഉൾപ്പെടെ റിസ്‌വാൻ 1326 റൺസാണ് നേടിയത്. 134.89 ആണ് സ്ട്രൈക്ക് റേറ്റ്. ട്വന്റി-20 ലോകകപ്പിൽ ഉൾപ്പെടെ വിക്കറ്റിന് പിന്നിലും റിസ്‌വാൻ മികച്ച പ്രകടനമാണ് പുറത്തെടുത്തത്.

മികച്ച മാച്ച് വിന്നിംഗ് ഇന്നിംഗ്സുകളാണ് ബ്യൂമോണ്ടിനെ പുരസ്കാരത്തിന് അർഹയാക്കിയത്. കഴി‍ഞ്ഞ വർഷം 9 മത്സരങ്ങളിൽ നിന്ന് 33.66 ശരാശരിയിൽ 3 അ‌ർദ്ധ സെഞ്ച്വറി ഉൾപ്പെടെ 303 റൺസാണ് ബ്യൂമോണ്ട് നേടിയത്. ഇംഗ്ലണ്ടിനായി കഴിഞ്ഞ വർഷം ട്വന്റി-20യിൽ ഏറ്റവും കൂടുതൽ റൺസ് നേടിയ താരവും മികച്ച ഫീൽഡർ കൂടിയായ ബ്യൂമോണ്ട് തന്നെയാണ്.