തിരുവനന്തപുരം: മാർച്ച് 28, 29 തീയതികളിൽ നടക്കുന്ന 48 മണിക്കൂർ പൊതുപണിമുടക്കിൽ ഇരുചക്ര വാഹനയാത്രയും ട്രെയിൻ യാത്രയും ഉപേക്ഷിക്കണമെന്ന് ട്രേഡ് യൂണിയൻ സംയുക്ത സമിതി നേതാവ് ആനത്തലവട്ടം ആനന്ദൻ അഭ്യർത്ഥിച്ചു. 28നു രാവിലെ 6 മുതൽ 30നു രാവിലെ 6 വരെയാണ് പണിമുടക്ക്. ആശുപത്രി, ആംബുലൻസ്, മരുന്നുകടകൾ, പാൽ, പത്രം, ഫയർ ആൻഡ് റസ്ക്യൂ പോലുള്ള ആവശ്യ സർവീസുകളെ പണിമുടക്കിൽ നിന്ന് ഒഴിവാക്കി. കേരളത്തിലെ 22 തൊഴിലാളി സംഘടനകളാണ് പണിമുടക്കിൽ പങ്കെടുക്കുന്നത്.
തൊഴിലാളി വിരുദ്ധ ലേബർ കോഡുകൾ പിൻവലിക്കുക, കർഷകരുടെ 6 ആവശ്യങ്ങൾ അടങ്ങിയ അവകാശപത്രിക ഉടൻ പ്രഖ്യാപിക്കുക, കാർഷികോത്പനങ്ങൾക്ക് താങ്ങുവില പ്രഖ്യാപിക്കുക തുടങ്ങി 12 ആവശ്യങ്ങൾ ഉന്നയിച്ചാണ് പണിമുടക്ക്. ഓരോ ജില്ലകളിലും ചുരുങ്ങിയത് 25 സമരകേന്ദ്രങ്ങളുണ്ടാകും. പണിമുടക്കുന്ന തൊഴിലാളികൾ രാവിലെ 9ന് എല്ലാ കേന്ദ്രങ്ങളിലേക്കും പ്രതിഷേധ റാലികൾ സംഘടിപ്പിക്കും.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |