അമരാവതി: തെന്നിന്ത്യൻ താരറാണി റോജ ഇനി മന്ത്രിക്കസേരയിലിരുന്ന് ആക്ഷനെടുക്കും. ആന്ധ്രാപ്രദേശിൽ തിങ്കളാഴ്ച സത്യപ്രതിജ്ഞ ചെയ്ത് അധികാരമേറ്റ മുഖ്യമന്ത്രി വൈ.എസ്. ജഗൻമോഹൻ റെഡ്ഡിയുടെ പുതിയ 25 അംഗ മന്ത്രിസഭയിൽ ആർ.കെ. റോജ ശെൽവമണിയടക്കം നാലു വനിതകളുണ്ട്. വിനോദസഞ്ചാരം, സാംസ്‌കാരികം, യുവജനകാര്യം എന്നീ വകുപ്പുകളാണ് റോജയ്ക്ക് ലഭിച്ചത്. വൈ.എസ്.ആർ. കോൺഗ്രസ് പാർട്ടിയുടെ തീപ്പൊരി നേതാവായ കെ.ആർ. റോജ രണ്ടാം തവണയാണ് നഗരി മണ്ഡലത്തിൽ നിന്ന് നിയമസഭയിലേക്ക് തിരഞ്ഞെടുക്കപ്പെടുന്നത്.

13 പുതുമുഖങ്ങളെ ഉൾപ്പെടുത്തിയാണ് ജഗൻ മന്ത്രിസഭ പുനഃസംഘടിപ്പിച്ചത്. പഴയ മന്ത്രിസഭയിലെ 11 പേരെ നിലനിറുത്തി. അമരാവതിയിൽ നടന്ന പൊതുചടങ്ങിൽ ഗവർണർ ബിശ്വഭൂഷൻ ഹരിചന്ദൻ സത്യവാചകം ചൊല്ലിക്കൊടുത്തു. ജാതി, സമുദായാടിസ്ഥാനത്തിലാണ് മന്ത്രിസഭയുടെ പുനഃസംഘടന. പത്തു മന്ത്രിസ്ഥാനങ്ങൾ പിന്നാക്കവിഭാഗങ്ങൾക്കാണ്. മുൻമന്ത്രിസഭയിലേതുപോലെ അഞ്ചുപേർക്ക് ഉപമുഖ്യമന്ത്രിപദം നൽകിയിട്ടുണ്ട്.