ആലപ്പുഴ: ചാരുംമൂട് സംഘർഷത്തിൽ സി പി ഐ, കോൺഗ്രസ് പ്രവർത്തകർക്കെതിരെ കേസെടുത്തു. പൊലീസിനെ ആക്രമിച്ചതിനും ജോലി തടസപ്പെടുത്തിയതിനുമടക്കം നാല് കേസുകളാണ് രജിസ്റ്റർ ചെയ്തത്. സംഘർഷത്തിന്റെ പശ്ചാത്തലത്തിൽ പ്രദേശത്ത് ഇന്ന് ഹർത്താലാണ്.

ചാരുംമൂടിൽ നൂറനാട് കോൺഗ്രസ് ബ്ലോക്ക് ഓഫീസിന് സമീപത്തായിരുന്നു കോൺഗ്രസ്-സി പി ഐ പ്രവർത്തകർ ഏറ്റുമുട്ടിയത്. സി പി ഐ പ്രവർത്തകർ കോൺഗ്രസ് ബ്ലോക്ക് ഓഫീസ് അടിച്ചു തകർത്തു. സംഘർഷത്തിൽ 12 കോൺഗ്രസ് പ്രവർത്തകർക്കും രണ്ട് പൊലീസുകാർക്കും പരിക്കേറ്റിരുന്നു.

കോൺഗ്രസ് ബ്ലോക്ക് ഓഫീസ് പ്രസിഡന്റ് ഷറഫുദ്ദീന്റെ വീടിനോട് ചേർന്ന് ഒരു കടമുറി വാടകയ്‌ക്ക് നൽകാൻ തീരുമാനിച്ചിരുന്നു. ഇവിടെ സി പി ഐ കൊടി നാട്ടിയതോടെയാണ് പ്രശ്നങ്ങൾക്ക് തുടക്കം. കോൺഗ്രസ് പ്രവർത്തകർ പ്രകടനമായെത്തി കൊടി നീക്കി. ഇതോടെ സി പി ഐ പ്രവർത്തകർ ഇവിടെ മറ്റൊരു കൊടി സ്ഥാപിച്ചു. തുടർന്ന് ഇരുവിഭാഗവും സംഘടിച്ചെത്തി കല്ലേറിലും തമ്മിൽ തല്ലിലും കലാശിച്ചു.