ബൈഡൻ ദക്ഷിണ കൊറിയയിൽ

സോൾ : ആറ് ദിവസത്തെ ഏഷ്യൻ പര്യടനത്തിന് തുടക്കമിട്ട് യു.എസ് പ്രസിഡന്റ് ജോ ബൈ‌ഡൻ ഇന്നലെ ദക്ഷിണ കൊറിയയിലെത്തി. സാംസങ്ങിന്റെ കമ്പ്യൂട്ടർ ചിപ്പ് പ്ലാന്റ് ബൈഡൻ സന്ദർശിച്ചു. ഉത്തര കൊറിയ മിസൈൽ പരീക്ഷണങ്ങൾ തുടരുന്നതിനിടെയാണ് ബൈഡൻ അയൽരാജ്യമായ ദക്ഷിണ കൊറിയയിലെത്തിയിരിക്കുന്നത്.

ബൈഡനും ദക്ഷിണ കൊറിയൻ പ്രസിഡന്റ് യൂൻ സുക് യോലും ഉത്തര കൊറിയൻ ഭീഷണിയെ സംബന്ധിച്ച ചർച്ചകൾ നടത്തും. പ്രസിഡന്റ് പദത്തിലെത്തിയ ശേഷം ഇതാദ്യമായാണ് ബൈഡൻ ഒരു ഏഷ്യൻ രാജ്യത്തെത്തുന്നത്.

ദക്ഷിണ കൊറിയയിൽ മൂന്ന് ദിനം ചെലവഴിച്ച ശേഷം ക്വാഡ് ഉച്ചകോടിയിൽ പങ്കെടുക്കാൻ ബൈഡൻ ഞായറാഴ്ച ജപ്പാനിലേക്ക് തിരിക്കും. വരുന്ന ചൊവ്വാഴ്ച ഇന്ത്യൻ പ്രധാനമന്ത്രി നരേന്ദ്ര മോദി ഉൾപ്പെടെയുള്ള ക്വാഡ് നേതാക്കളുമായി ബൈഡൻ ചർച്ച നടത്തും.