ഡിജിറ്റൽ ഇടപാടുകൾ ദിനംപ്രതി വർദ്ധിച്ചുകൊണ്ടിരിക്കുകയാണ്. നിരവധി ആളുകളാണ് ഇന്ന് ക്രെഡിറ്റ് കാർഡുകൾ ഉപയോഗിക്കുന്നത്. ഒട്ടനവധി ഓഫറുകളുമായി കമ്പനികളും എത്താറുണ്ട്. ഇന്ത്യയിലെ ഒരു ഉപയോക്താവ് ക്രെഡിറ്റ് കാർഡിലൂടെ പ്രതിമാസം 14,500 രൂപ ചെലവഴിക്കുന്നുവെന്നാണ് കണക്കുകൾ പറയുന്നത്.
പലപ്പോഴും ക്രെഡിറ്റ് കാർഡുകൾ ഗുണം ചെയ്യാറുണ്ട്. എന്നാൽ ചെറിയൊരു ശ്രദ്ധക്കുറവ് മതി വലിയ നഷ്ടങ്ങളിലേക്ക് നയിക്കാൻ. ക്രെഡിറ്റ് കാർഡുകളിൽ വരുത്തുന്ന പിഴവ് സിബിൽ സ്കോറിനെ കാര്യമായി ബാധിക്കാറുണ്ട്.
ഒരാളുടെ ക്രെഡിറ്റ് ഹിസ്റ്ററി, റേറ്റിംഗ്, വിശദാംശങ്ങൾ എന്നിവയുടെ മൂന്നക്ക സംഗ്രഹമാണ് സിബിൽ സ്കോർ. സിബിൽ റിപ്പോർട്ട് അഥവാ ക്രെഡിറ്റ് ഇൻഫർമേഷൻ റിപ്പോർട്ടിലെ ഹിസ്റ്ററി നോക്കിയാണ് സ്കോർ നിശ്ചയിക്കുന്നത്. തെറ്റായ ക്രെഡിറ്റ് കാർഡ് ഉപയോഗം ലോൺ അവസരങ്ങൾ ഇല്ലാതാക്കും.
300 മുതൽ 900 വരെയാണ് സിബിൽ സ്കോറിന്റെ റേഞ്ച്. 900 നോട് അടുക്കുന്തോറും നിങ്ങളുടെ സ്കോർ മെച്ചപ്പെടുന്നു. 700-900 റേഞ്ചിനെ മികച്ച സിബിൽ സ്കോർ ഗണത്തിൽപ്പെടുത്തിയിട്ടുണ്ട്. ക്രെഡിറ്റ് കാർഡ് കൃത്യമായി ഉപയോഗിച്ച് സിബിൽ സ്കോർ കാത്ത് സൂക്ഷിക്കാനും വളരെയധികം പലിശ ഒഴിവാക്കുന്നതിനും മൂന്ന് കാര്യങ്ങൾ പ്രധാനമായും ശ്രദ്ധിക്കണം.
ക്രെഡിറ്റ് കാർഡ് പരിധിയുടെ 30 ശതമാനത്തിൽ കൂടുതൽ ഉപയോഗിക്കരുത്
ക്രെഡിറ്റ് കാർഡിൽ നിന്ന് എല്ലാ മാസവും 40,000 രൂപ ചെലവഴിക്കുന്നയാളാണ് നിങ്ങളെന്ന് കരുതുക. നിശ്ചിത തിയതിക്ക് മുൻപ് മുഴുവൻ തുകയും അടയ്ക്കുന്നുമുണ്ട്. ഇത് നല്ലതാണ്, എന്നാൽ നിങ്ങളുടെ കാർഡിന്റെ ആകെ പരിധി 50,000 രൂപയാണെങ്കിൽ പ്രശ്നമാണ്.
ആകെ ക്രെഡിറ്റ് പരിധിയുടെ 80 ശതമാനത്തോളം നിങ്ങൾ ഉപയോഗിക്കുന്നുവെന്നാണ് ഇത് സൂചിപ്പിക്കുന്നത്. സിബിൽ സ്കോറിനെ ഇത് സാരമായി ബാധിക്കും. അതിനാൽ ആകെ ക്രെഡിറ്റ് പരിധിയുടെ 30 ശതമാനം ഉപയോഗിക്കുന്നതാണ് നല്ലതെന്ന് വിദഗ്ദ്ധർ ചൂണ്ടിക്കാട്ടുന്നു.
ക്രെഡിറ്റ് കാർഡ് മുഖേന പണം പിൻവലിക്കരുത്
ഒരിക്കലും ക്രെഡിറ്റ് കാർഡ് മുഖേന പണം പിൻവലിക്കരുതെന്നാണ് സാമ്പത്തിക വിദഗ്ദ്ധർ പറയുന്നത്.
ഒരു ക്രെഡിറ്റ് കാർഡ് ഉപയോഗിച്ച് എ.ടി.എമ്മിൽ നിന്ന് പണം പിൻവലിക്കുന്നത് എളുപ്പമാണെന്ന് തോന്നുമെങ്കിലും പിന്നീട് ബുദ്ധിമുട്ടും. പ്രതിമാസം ഏകദേശം 2.5 മുതൽ 3.5 ശതമാനം പലിശയാണ് പണം പിൻവലിച്ചാൽ ഈടാക്കുക. അതായത് പ്രതിവർഷം 40% പലിശയാണ് ഇത്തരത്തിൽ നൽകേണ്ടി വരിക.
സാധാരണ ക്രെഡിറ്റ് കാർഡ് കുടിശ്ശിക അടയ്ക്കുന്നതിന് ഏകദേശം 50 ദിവസത്തെ പലിശ രഹിത കാലയളവ് ലഭിക്കും. എന്നാൽ അത് പണം പിൻവലിക്കലിന് ബാധകമല്ല. കൂടാതെ, നിശ്ചിത തീയതിക്ക് മുമ്പ് ക്യാഷ് അഡ്വാൻസ് തിരികെ നൽകുന്നതിൽ പരാജയപ്പെട്ടാൽ ക്രെഡിറ്റ് കാർഡ് കമ്പനി ലേറ്റ് പേയ്മെന്റ് ചാർജും ഈടാക്കും.
മിനിമം പേയ്മെന്റ് നടത്തരുത്
ഒരു ക്രെഡിറ്റ് കാർഡ് ബിൽ വരുമ്പോൾ രണ്ട് ഓപ്ഷനുകളുണ്ട്. ഒന്ന് മുഴുവൻ തുകയും അടയ്ക്കുക, മറ്റൊന്ന് ഏറ്റവും കുറഞ്ഞ തുക അടയ്ക്കുക. സാധാരണയായി മൊത്തം കുടിശ്ശികയുടെ അഞ്ച് ശതമാനം ആയിരിക്കും ഇത്. കുടിശ്ശികയുടെ ഏറ്റവും കുറഞ്ഞ തുക അടയ്ക്കുന്നതിലൂടെ ലേറ്റ് പേയ്മെന്റ് ഫീസ് ഒഴിവാക്കാൻ സഹായിക്കുന്നു.
എന്നാൽ ഈ കുറഞ്ഞ തുക പ്രതിവർഷം 40% പലിശയായി മാറും. 50 ദിവസത്തെ പലിശ രഹിത കാലയളവിന്റെ ആനുകൂല്യം നിങ്ങൾക്ക് ലഭിക്കില്ല എന്നതും ശ്രദ്ധേയമാണ്. ക്രെഡിറ്റ് ബില്ലിന്റെ മുഴുവൻ തുക അടയ്ക്കാൻ ഒരു വഴിയും ഇല്ലെങ്കിൽ മാത്രം മിനിമം പേയ്മെന്റ് ചെയ്യുക.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |