ഹൃതിക് റോഷൻ, സെയ്‌ഫ് അലിഖാൻ എന്നിവരെ പ്രധാന കഥാപാത്രങ്ങളാക്കി പുഷ്‌കർ - ഗായത്രി സംവിധാനം ചെയ്യുന്ന വിക്രം വേദ പാക്കപ്പ് ആയി. ഈ സന്തോഷം ആരാധകരുമായി ഹൃത്വിക് റോഷൻ പങ്കുവച്ചു. ഒരുപാട് ഓർമ്മകളും പരീക്ഷണങ്ങൾ നിറഞ്ഞ നിമിഷങ്ങളും ആക്ഷനും ത്രില്ലും ഒപ്പം ഈ ചിത്രം ഒരുക്കാൻ ഞങ്ങൾ നൽകേണ്ടിവന്ന കഠിനാദ്ധ്വാനവുമൊക്കെയാണ് എന്റെ മനസിലേക്ക് ഓടിയെത്തിയത്. റിലീസിനോടടുക്കുമ്പോൾ ആവേശത്തിനൊപ്പം പരിഭ്രമവുമുണ്ട്. സെയ്ഫിനൊപ്പം ഒത്തുച്ചേരാൻ കഴിഞ്ഞതിൽ സന്തോഷം. ഹൃത്വിക് കുറിച്ചു. വിജയ് സേതുപതി - മാധവൻ ടീം ഒന്നിച്ച തമിഴ് സൂപ്പർ ഹിറ്റിന്റെ റീമേക്ക് ആണിത്. രാധിക ആപ്‌തെ, രോഹിത് നറഫ്, യോഗിത ബിഹാനി, ഹരീബ് ഹാഷ്മി എന്നിവരാണ് മറ്റു താരങ്ങൾ. വിശാൽ ശേഖർ ആണ് സംഗീത സംവിധാനം. സെപ്തംബർ 30ന് തിയേറ്ററുകളിൽ എത്തും.