മിക്സഡ് ഡബിൾസിൽ സാനിയ - സഖ്യവും ക്വാർട്ടർ ഫൈനലിൽ

ലണ്ടൻ : പ്രീ ക്വാർട്ടറിലെ വൈൽഡ് കാർഡ് എൻട്രിയായ ടിം വാൻ റൈത്തോവനെ കീഴടക്കി മുൻ ലോക ഒന്നാം നമ്പർ താരം നൊവാക്ക് ജോക്കോവിച്ച് വിംബിൾഡൺ ടെന്നിസിന്റെ ക്വാർട്ടർ ഫൈനലിലെത്തി. നാലുസെറ്റ് നീണ്ട മത്സരത്തിൽ 6-2, 4-6, 6-1, 6-2 എന്ന സ്കോറിനായിരുന്നു നൊവാക്കിന്റെ വിജയം. 25കാരനായ ഡച്ച് താരം രണ്ടാം സെറ്റിൽ മികവ് കാട്ടിയെങ്കിലും തുടർന്ന് നൊവാക്കിന്റെ കരുത്തിനും കൗശലത്തിനും പരിചയസമ്പത്തിനും മുന്നിൽ തോൽവി സമ്മതിക്കുകയായിരുന്നു.

ഇത് 13-ാം തവണയാണ് നൊവാക്ക് വിംബിൾഡൺ ക്വാർട്ടറിലെത്തുന്നത്. വിംബിൾഡണിലെ തന്റെ 83-ാം വിജയം കുറിച്ച നൊവാക്ക് പുൽക്കോർട്ടിൽ തോൽവിയറിയാത്ത 25 മത്സരങ്ങളും പൂർത്തിയാക്കി.

ക്വാർട്ടർ ഫൈനലിൽ പത്താം സീഡ് ഇറ്റാലിയൻ താരം യാന്നിക്ക് സിന്നറാണ് നൊവാക്കിന്റെ എതിരാളി. പ്രീ ക്വാർട്ടറിൽ സ്പാനിഷ് താരം കാർലോസ് അൽക്കാരസിനെ 6-1 6-4 6-7(8) 6-3 ന് കീഴടക്കിയാണ് സിന്നർ അവസാന എട്ടിലേക്ക് കാലെടുത്തുവച്ചത്.

വനിതാ വിഭാഗത്തിൽ ജർമ്മനിയുടെ തത്യാന മരിയ ,ടുണീഷ്യയുടെ ഒൻസ് ജബേയുർ എന്നിവർ ക്വാർട്ടറിലെത്തി. തത്യാന പ്രീ ക്വാർട്ടറിൽ 5-7 7-5 7-5 ന് ലാത്വിയൻ താരം യെലെേ ഒസ്റ്റാപെങ്കോയെയാണ് കീഴടക്കിയത്. ജബേയുർ 7-6(9) 6-4 ന് ബെൽജിയത്തിന്റെ എലസെ മെർാെൻസിനെ തോൽപ്പിച്ചു.

മിക്സഡ് ഡബിൾസിൽ ഇന്ത്യയുടെ സാനിയ മിർസയും ക്രൊയേഷ്യയുടെ മാറ്റ് പാവിച്ചും വാക്കോവറിലൂടെ ക്വാർട്ടറിലെത്തി. പ്രീ ക്വാർട്ടറിൽ ഇവാൻ ഡോഡിഗ് - ലതീഷ ചാൻ സഖ്യം പിന്മാറിയതാണ് സാനിയയുടെ മുന്നേറ്റം എളുപ്പമാക്കിയത്. ആദ്യ റൗണ്ടിൽ ഡേവിഡ് വേഗ -നഥേല സഖ്യത്തെ തോൽപ്പിച്ച സാനിയ സഖ്യത്തിൽ ക്വാർട്ടറിൽ ജോൺ പിയേഴ്സ്-ഗബ്രിയേല ദബ്രോവ്സ്കി സഖ്യമാണ് എതിരാളികൾ.