ടിക്കറ്റ് ബുക്കിംഗിന് തുടക്കം കൊച്ചിയിലേക്കും സർവീസ്
ന്യൂഡൽഹി: ഇന്ത്യയിലെ ഏറ്റവും പുത്തൻ വിമാനക്കമ്പനിയായ ആകാശ എയറിന്റെ ആദ്യ സർവീസ് ആഗസ്റ്റ് ഏഴിന് മുംബയിൽ നിന്ന് അഹമ്മദാബാദിലേക്ക്. ശതകോടീശ്വരനും അസറ്റ് മാനേജ്മെന്റ് വിദഗ്ദ്ധനുമായ രാകേഷ് ജുൻജുൻവാല പ്രമോട്ടറായ ആകാശ എയറിന് ഡയറക്ടറേറ്റ് ജനറൽ ഒഫ് സിവിൽ ഏവിയേഷന്റെ (ഡി.ജി.സി.എ) പറക്കൽ സർട്ടിഫിക്കറ്റ് ഉൾപ്പെടെ അനിവാര്യ അനുമതികളെല്ലാം ലഭിച്ചുകഴിഞ്ഞു.
28 പ്രതിവാര സർവീസുകളാണ് കമ്പനിക്കുണ്ടാവുക. മുംബയ്-അഹമ്മദാബാദ് സർവീസിലേക്കുള്ള ടിക്കറ്റ് ബുക്കിംഗ് ആരംഭിച്ചു. ആദ്യഘട്ടത്തിൽ മുംബയ്, അഹമ്മദാബാദ്, കൊച്ചി, ബംഗളൂരു നഗരങ്ങളിലേക്കാണ് സർവീസ്. ബംഗളൂരു-കൊച്ചി സർവീസ് ആഗസ്റ്റ് 13ന് ആരംഭിക്കും. ബോയിംഗിന്റെ രണ്ട് 737 മാക്സ് വിമാനങ്ങളാണ് തുടക്കത്തിലുണ്ടാവുക.
കൊച്ചിയിലേക്ക് ₹3,483
ആഗസ്റ്റ് 13ന് ബംഗളൂരുവിൽ നിന്ന് രാവിലെ 7.15ന് പുറപ്പെടുന്ന വിമാനം 8.30ന് കൊച്ചിയിലെത്തും. രാവിലെ 11നും വിമാനമുണ്ട്. ഉച്ചയ്ക്ക് 12.30ന് കൊച്ചിയിലെത്തും. ബംഗളൂരു-കൊച്ചി നിരക്ക് 3,483 രൂപ.
3,948 രൂപയാണ് മുംബയ്-അഹമ്മദാബാദ് നിരക്ക്. റൂട്ടിൽ മറ്റ് വിമാനങ്ങളുടെ ശരാശരി നിരക്ക് 4,200 രൂപയാണ്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |