തിരുവനന്തപുരം: സംസ്ഥാനം രൂക്ഷമായ സാമ്പത്തിക പ്രതിസന്ധി നേരിടുന്ന സാഹചര്യത്തിൽ സർക്കാർ വാഹനങ്ങളുടെ കണക്കെടുപ്പ് നടത്താൻ ധനകാര്യവകുപ്പ് നടപടി തുടങ്ങി. പൊലീസിലുൾപ്പെടെ വാഹനങ്ങളുടെ ദുരുപയോഗം കൂടുന്നതായാണ് കണ്ടെത്തൽ. ഇന്ധനച്ചെലവ് കുറയ്ക്കുകവഴി വലിയൊരു തുക ലാഭിക്കാമെന്നാണ് പ്രതീക്ഷ.

വാഹനങ്ങളുടെ കണക്ക് സൂക്ഷിക്കാൻ നേരത്തെ വീൽസ് എന്ന സംവിധാനമുണ്ടായിരുന്നെങ്കിലും വേണ്ടത്ര കാര്യക്ഷമമായില്ല. കൈവശമുള്ള വാഹനങ്ങളുടെ കണക്ക് കൈമാറാൻ എല്ലാ വകുപ്പ് മേധാവികൾക്കും കത്തു നൽകും. രജിസ്റ്റർ ചെയ്യാത്ത വാഹനങ്ങളുണ്ടെങ്കിൽ അതിന്റെ വിശദീകരണം നൽകണം. അടുത്ത ഘട്ടമായി പൊതുമേഖലാ സ്ഥാപനങ്ങളിലെ വാഹനങ്ങളുടെ കണക്ക് ശേഖരിക്കും.