തൃശൂർ: ആമ്പല്ലൂർ സിഗ്നൽ ജംഗ്ഷനിൽ നിയന്ത്രണം വിട്ട ലോറി മറ്റ് വാഹനങ്ങളിൽ ഇടിച്ചു. സിഗ്നൽ കാത്തുകിടന്ന ആഡംബര കാറുകൾ ഉൾപ്പടെയുള്ള എട്ട് വാഹനങ്ങളിലാണ് ലോറിയിടിച്ചത്. പുലർച്ചെ ഒരു മണിയോടെയായിരുന്നു അപകടം.

മഹാരാഷ്ട്ര രജിസ്‌ട്രേഷനിലുള്ള ലോറി നിയന്ത്രണം വിട്ട് കെ എസ് ആർ ടി സി ബസുൾപ്പടെയുള്ള വാഹനങ്ങളിൽ ഇടിക്കുകയായിരുന്നു. അപകടത്തിൽ പരിക്കേറ്റവരെ സ്വകാര്യ ആശുപത്രികളിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല.

അപകടത്തിൽ രണ്ട് കാറുകൾ പൂർണമായും തകർന്നു. ഡ്രൈവർ ഉറങ്ങിപ്പോയതാകാം അപകട കാരണമെന്നാണ് പ്രാഥമിക നിഗമനം.