സിനിമാ താരങ്ങളുടെ ഫിറ്റ്നസിനെപ്പറ്റി സംസാരിക്കുമ്പോൾ മിക്കയാളുകളുടെയും മനസിൽ വരുന്നത് ബോളിവുഡ് താരം ഹൃത്വിക് റോഷന്റെ മുഖമായിരിക്കും. ഫിറ്റ്‌നസ് ഫ്രീക്കുകൾ മോഡലായി കാണുന്ന ഹൃത്വിക് റോഷൻ ഭക്ഷണ കാര്യത്തിലും വ്യായാമത്തിലും അതീവ ശ്രദ്ധാലുവാണ്.

48-ാം വയസിലാണ് ഹൃത്വിക് റോഷൻ 'വിക്രം വേദ' ചെയ്യുന്നത്. ശരീര ഘടനയിൽ ഏറെ ശ്രദ്ധിക്കാറുള്ള താരം കഠിനാധ്വാനിയാണ്. താരത്തിന്റേത് പോലത്തെ ശരീരഘടന കൈവരിക്കാൻ ചില രഹസ്യ പൊടിക്കെെകൾ അറിഞ്ഞിരിക്കണം. ഹൃത്വിക് ഇക്കാര്യങ്ങൾ സോഷ്യൽ മീഡിയയിലൂടെ ആരാധക‌ർക്കായി പങ്കുവയ്‌ക്കാറുണ്ട്.

വ്യായാമവും പോഷകാഹാരവും സംയോജിപ്പിക്കുക: ശരിയായതും സമീകൃതവുമായ പോഷകാഹാരം ഉൾപ്പെടുന്നതുവരെ വ്യായാമത്തിന്റെ ഫലങ്ങൾ കൈവരിക്കാൻ കഴിയില്ലെന്നത് വസ്തുതയാണ്. ശരീരത്തിന് ആവശ്യമായ ഊർജ്ജം നൽകുന്നതിന് പഴങ്ങളും പച്ചക്കറികളും മാംസവും ശരിയായ അളവിൽ കഴിക്കേണ്ടത് അത്യാവശ്യമാണ്.

കാർഡിയോയ്‌ക്കൊപ്പം വെയിറ്റ് ട്രെയിനിംഗും: ഹൃത്വിക് തന്റെ ഭക്ഷണക്രമത്തോടൊപ്പം വ്യായാമവും ശീലമാക്കുന്ന ആളാണ്. നീന്തൽ, ഓട്ടം, നടത്തം എന്നീ കാർഡിയോയ്‌ക്ക് പുറമേ, ആഴ്‌ചയിൽ നാല് ദിവസം കഠിനമായ വെയിറ്റ് ട്രെയിനിംഗും അദ്ദേഹം പിന്തുടരുന്നുണ്ട്.

പ്രോട്ടീൻ സമ്പുഷ്‌ടമായ ആഹാരം കഴിക്കുക: ഭക്ഷണത്തിന്റെ കാര്യത്തിൽ വിട്ടുവീഴ്ച ചെയ്യാത്ത ആളാണ് ഹൃത്വിക് റോഷൻ. ഓരോ മൂന്ന് മണിക്കൂർ കൂടുമ്പോഴും ഭക്ഷണം കഴിക്കുമെന്ന് ഹൃത്വിക് പറയുന്നു. നാരുകൾ അടങ്ങിയ ഭക്ഷണങ്ങൾക്കൊപ്പം ഉയർന്ന പ്രോട്ടീൻ ഭക്ഷണം അദ്ദേഹം കഴിക്കുന്നു. ഇടയ്ക്കിടെ ഡാർക്ക് ചോക്ലേറ്റ് കഴിക്കാറുണ്ടെന്നും ഇത് ശരീരത്തിലെ ആന്റിഓക്‌സിഡന്റുകൾ വർദ്ധിപ്പിക്കാൻ സഹായിക്കുമെന്നും താരം പറയുന്നു.

ഒരിക്കലും ഒറ്റയ്ക്ക് പരിശീലിക്കരുത്: ഒരാൾക്ക് തന്റെ ലക്ഷ്യങ്ങൾ നേടിയെടുക്കാൻ എപ്പോഴും പ്രചോദനം ആവശ്യമാണെന്ന് ഹൃത്വിക് പറയുന്നു. വ്യായാമത്തിന് ഒരു പങ്കാളിയെ കണ്ടെത്തണമെന്ന് അദ്ദേഹം പറയുന്നു. താരത്തിന്റെ ഇൻസ്റ്റാഗ്രാം റീലുകളിൽ രണ്ട് ആൺമക്കളും അദ്ദേഹത്തോടൊപ്പം പുഷ് അപ്പുകൾ ചെയ്യുന്നത് നമുക്ക് കാണാൻ കഴിയും. പങ്കാളികൾക്ക് പരസ്പരം പ്രോത്സാഹിപ്പിക്കാമെന്നും കൂടുതൽ കഠിനാധ്വാനം ചെയ്യാനാകുമെന്നും അദ്ദേഹം കരുതുന്നു.

സ്റ്റിറോയിഡുകൾ വേണ്ടെന്ന് തീരുമാനിക്കുക: താരങ്ങൾ അവരുടെ സിനിമകൾക്കായി സ്റ്റിറോയിഡുകൾ ഉപയോഗിക്കാറുണ്ട്. എന്നാൽ സ്റ്റിറോയിഡുകൾ ഒരാളുടെ മെറ്റബോളിസത്തെ ബാധിക്കുകയും ശരീരത്തിലെ കൊഴുപ്പ് സംഭരണത്തെ ദോഷകരമായി ബാധിക്കുകയും ചെയ്യുന്നു. അതിനാൽ അവ കഴിക്കരുതെന്ന് ഹൃത്വിക് ഉപദേശിക്കുന്നു. സ്റ്റിറോയിഡുകൾ ഒരാളുടെ വിശപ്പ് വർദ്ധിപ്പിക്കുകയും പിന്നീട് വൻതോതിൽ ശരീരഭാരം വർദ്ധിപ്പിക്കുകയും ചെയ്യും.

പൊടിക്കെെകളും നിർദേശങ്ങളും മനസിലാക്കിയിരിക്കുന്നത് നല്ലതാണ്. എന്നാൽ അവ പ്രൊഫഷണൽ മെഡിക്കൽ ഉപദേശമായി കണക്കാക്കരുത്. ഏതെങ്കിലും ഫിറ്റ്നസ് പ്രോഗ്രാം ആരംഭിക്കുന്നതിന് മുമ്പ് അല്ലെങ്കിൽ നിങ്ങളുടെ ഭക്ഷണക്രമത്തിൽ എന്തെങ്കിലും മാറ്റങ്ങൾ വരുത്തുന്നതിന് മുമ്പ് എല്ലായ്പ്പോഴും നിങ്ങളുടെ ഡോക്ടറെയോ ഡയറ്റീഷ്യനെയോ സമീപിക്കേണ്ടതാണ്.