കൊച്ചി: സിരകളിൽ റേസിംഗ് ഡി.എൻ.എയുമായി പോർഷയുടെ പുതിയ 911 ജി.ടി3 ആർ.എസ് വിപണിയിൽ. ഏറെ സ്വീകാര്യതയുള്ള 911 ശ്രേണിയിലെ പുതുമുഖമായ ഈ മോഡൽ 3.2 സെക്കൻഡുകൊണ്ട് പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കുമെന്ന് പോർഷ പറയുന്നു.
മണിക്കൂറിൽ 296 കിലോമീറ്ററാണ് ടോപ് സ്പീഡ്. മൂന്ന് ഡ്രൈവിംഗ് മോഡുകളുണ്ട് - നോർമൽ,​ സ്പോർട്ട്,​ ട്രാക്ക്. 525 എച്ച്.പി കരുത്തും 465 എൻ.എം ടോർക്കുമുള്ളതാണ് 4.0 ലിറ്റർ എൻജിൻ. 7-സ്പീഡ് പോ‌ർഷ ഡോപ്പൽകുപ്ളംഗ് (പി.കെ.ഡി)​ ട്രാൻസ്‌മിഷൻ സംവിധാനമാണുള്ളത്. മികച്ച ഡ്രൈവിംഗ് ആസ്വാദനം നൽകുന്ന പുത്തൻ മോഡലിന് പുതിയ റിയർവിംഗ് കാണാം.
അതാകട്ടെ റൂഫിനേക്കാൾ വലുതുമാണ്; എയർബ്രേക്കായി പ്രവർത്തിക്കുകയും ചെയ്യും. പോർഷ ശ്രേണിയിൽ തന്നെ ഇത് ആദ്യവുമാണ്. ക്രമീകരിക്കാവുന്ന സസ്‌പെൻഷൻ,​ വിവിധോദ്ദേശ്യ മോഡുകളോട് കൂടിയ സ്റ്റിയറിംഗ് വീൽ,​ ഉയർന്ന വേഗതയിലും സുരക്ഷിത ഡ്രൈവിംഗ് സാദ്ധ്യമാക്കുന്ന ഡ്രാഗ് റിഡക്‌ഷൻ സിസ്റ്റം (ഡി.ഈർ.എസ് - പോർഷ ശ്രേണിയിൽ ഇത് ആദ്യമാണ്)​ തുടങ്ങി നിരവധി മികവുകളും പുതിയ മോഡലിനുണ്ട്. 911 ആർ.എസ്.ആർ.,​ 911 ജി.ടി3 ആർ എന്നിവയിൽ നിന്ന് പ്രചോദനമുൾക്കൊണ്ടാണ് പുതിയ മോഡലിന്റെ നിർമ്മാണം.