ഓണക്കാല റിലീസുകൾ നാളെ മുതൽ എത്തും. പത്തൊമ്പതാം നൂറ്റാണ്ട്, പാൽതു ജാൻവർ, ഒറ്റ്, ഗോൾഡ്, ഒരു തെക്കൻ തല്ല് കേസ് എന്നിവയാണ് ഓണം റിലീസായി എത്തുന്ന ചിത്രങ്ങൾ. വിക്രം നായകനായ തമിഴ് ചിത്രം കോബ്ര നാളെയും ബോളിവുഡ് ചിത്രം ബ്രഹ്മാസ്ത്ര സെപ്തംബർ 9നുംഎത്തും. മെഗാതാരങ്ങളായ മമ്മൂട്ടിയുടെയും മോഹൻലാലിന്റെയും ചിത്രങ്ങൾ റിലീസ് ചെയ്യാത്ത ഓണക്കാലമാണ് ഇത്തവണ. കഴിഞ്ഞ രണ്ടുവർഷം ഓണക്കാലത്ത് തിയേറ്ററുകൾ അടഞ്ഞുകിടക്കുന്ന സാഹചര്യമായിരുന്നു. ഇത്തവണ അതിനു മാറ്റം വന്നു എന്നതാണ് ഏറ്റവും വലിയ പ്രത്യേകത.
പാൽതു ജാൻവർ 2ന്
ബേസിൽ ജോസഫ് നായകനായി എത്തുന്ന പാൽതു ജാൻവർ നവാഗതനായ സംഗീത് പി. രാജൻ സംവിധാനം ചെയ്യുന്നു. ഇന്ദ്രൻസ്, ജോണി ആന്റണി, ദിലീഷ് പോത്തൻ, ഷമ്മി തിലകൻ, ശ്രുതി സുരേഷ്, ജയ കുറുപ്പ് എന്നിവരാണ് മറ്റു താരങ്ങൾ. രചന - വിനോയ് തോമസ്, അനീഷ് അഞ്ജലി, ഭാവന സ്റ്റുഡിയോസിന്റെ ബാനറിൽ ദിലീഷ് പോത്തനും ഫഹദ് ഫാസിലും ശ്യാം പുഷ്കരനും ചേർന്നാണ് നിർമ്മാണം.
ഒറ്റ് 2ന്
കുഞ്ചാക്കോ ബോബൻ - അരവിന്ദ് സ്വാമി എന്നിവരെ കേന്ദ്ര കഥാപാത്രമാക്കി ടി.പി. ഫെല്ലിനി സംവിധാനം ചെയ്യുന്ന ഒറ്റ് സെപ്തംബർ 2ന് എത്തും. തമിഴിലും മലയാളത്തിലുമായി ത്രില്ലർ പശ്ചാത്തലത്തിൽ ഒരുങ്ങുന്ന ചിത്രത്തിൽ തെലുങ്ക് താരം ഈഷ റെബ്ബ ആണ് നായിക. ജാക്കി ഷ്റോഫ് ആണ് മറ്റൊരു താരം. തിരക്കഥ എസ്. സജീവ്. ദ് ഷോ പീപ്പിളിന്റെ ബാനറിൽ തമിഴ് നടൻ ആര്യയും ഓഗസ്റ്റ് സിനിമാസിന്റെ ബാനറിൽ ഷാജി നടേശനും ചേർന്നാണ് നിർമ്മാണം.
പത്തൊമ്പതാം നൂറ്റാണ്ട് 8ന്
വിനയൻ സംവിധാനം ചെയ്യുന്ന ബ്രഹ്മാണ്ഡ ചിത്രം പത്തൊമ്പതാം നൂറ്റാണ്ട് തിരുവോണ ദിനമായ 8ന് റിലീസ് ചെയ്യും. നവോത്ഥാന നായകൻ ആറാട്ടുപുഴ വേലായുധപണിക്കരെ അവതരിപ്പിക്കുന്നത് സിജു വിത്സനാണ്. കയാദു ലോഹർ ആണ് നായിക. അനൂപ് മേനോൻ, ചെമ്പൻ വിനോദ്, സുദേവ് നായർ, ഗോകുലം ഗോപാലൻ, വിഷ്ണു, ടിനിടോം, ഇന്ദ്രൻസ്, രാഘവൻ, പൂനം ബജ്വ, ദീപ്തി സതി, ഡോ. ഷിനു ശ്യാമളൻ തുടങ്ങി വൻ താരനിര അണിനിരക്കുന്നു. വിനയൻ തന്നെ രചന നിർവഹിക്കുന്ന ചിത്രം ശ്രീഗോകുലം മൂവീസിന്റെ ബാനറിൽ ഗോകുലം ഗോപാലൻ ആണ് നിർമ്മാണം. ഛായാഗ്രഹണം ഷാജികുമാർ.
ഗോൾഡ് 8ന്
പൃഥ്വിരാജ്, നയൻതാര എന്നിവരെ പ്രധാന കഥാപാത്രങ്ങളാക്കി അൽഫോൻസ് പുത്രൻ സംവിധാനം ചെയ്യുന്ന ഗോൾഡ് 8ന് റിലീസ് ചെയ്യും. വിനയ് ഫോർട്ട്, അജ്മൽ, അബുസലിം, ഷറഫുദ്ദീൻ, റോഷൻ മാത്യു, സുരേഷ് കൃഷ്ണ, ജാഫർ ഇടുക്കി, ചെമ്പൻ വിനോദ്, ബാബുരാജ്, ദീപ്തി സതി, കൃഷ്ണ ശങ്കർ, മല്ലിക സുകുമാരൻ, ശാന്തികൃഷ്ണ, പ്രേംകുമാർ തുടങ്ങി അൻപതിൽപരം വമ്പൻ താരനിരയുണ്ട്. ചിത്രത്തിന്റെ രചന, എഡിറ്റിംഗ്, സ്റ്റണ്ട്, വിഷ്വൽ ഇഫക്ട്സ്, അനിമേഷൻ, കളർ ഗ്രേഡിംഗ് എന്നിവയും അൽഫോൻസ് തന്നെയാണ് നിർവഹിക്കുന്നത്. ഛായാഗ്രഹണം ആനന്ദ് സി. ചന്ദ്രൻ, വിശ്വജിത് ഒടുക്കത്തിൽ. പൃഥ്വിരാജ് പ്രൊഡക്ഷൻസ്, മാജിക് ഫ്രെയിംസ് എന്നിവരാണ് നിർമ്മാതാക്കൾ.
ഒരു തെക്കൻ തല്ല് കേസ് 8ന്
ബിജു മേനോൻ, പത്മപ്രിയ, റോഷൻ മാത്യു, നിമിഷ സജയൻ എന്നിവർ കേന്ദ്ര കഥാപാത്രങ്ങളെ അവതരിപ്പിക്കുന്ന ഒരു തെക്കൻ തല്ല് കേസ് 8ന് തിയേറ്ററിൽ. നവാഗതനായ ശ്രീജിത്ത് എൻ. സംവിധാനം ചെയ്യുന്ന ചിത്രം ജി.ആർ. ഇന്ദുഗോപന്റെ അമ്മിണിപിള്ള വെട്ടുകേസ് എന്ന ചെറുകഥയെ ആസ്പദമാക്കിയാണ് രാജേഷ് പിന്നാടന്റെ തിരക്കഥയും സംഭാഷണവും. മധു നീലകണ്ഠൻ ഛായാഗ്രഹണം നിർവഹിക്കുന്നു. ഇ ഫോർ എന്റർടെയ്ൻമെന്റിന്റെ ബാനറിൽ മുകേഷ് ആർ. മേത്ത, സി.വി. സാരഥി എന്നിവർ ചേർന്നാണ് നിർമ്മാണം.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |