അപകടത്തിൽ രണ്ടുപേർക്ക് പരിക്ക്

തിരുവല്ല: എം.സി.റോഡിലെ കുറ്റൂരിൽ കാറും ഇരുചക്ര വാഹനങ്ങളും കൂട്ടിയിടിച്ചുണ്ടായ അപകടത്തിൽ രണ്ടു പേർക്ക് പരിക്കേറ്റു. ഒരാളുടെ നില ഗുരുതരം. സ്കൂട്ടർ യാത്രികനായിരുന്ന തലയാർ മേമനയിൽ വീട്ടിൽ സോമൻ, ബൈക്ക് യാത്രികനായിരുന്ന കവിയൂർ സ്വദേശി സുജിഷ് എന്നിവർക്കാണ് പരിക്കേറ്റത്. ഇന്നലെ രാവിലെ 10ന് ആറാട്ടുകടവ് ജംഗ്ഷനിലായിരുന്നു അപകടം. ചെങ്ങന്നൂർ ഭാഗത്ത് നിന്നും വന്ന കാറും തലയാർ ഭാഗത്തേക്ക് പോയ ആക്ടീവയും തമ്മിൽ കൂട്ടിയിടിച്ചു. തുടർന്ന് നിയന്ത്രണം വിട്ട കാർ ബൈക്കിലും ഇടിക്കുകയായിരുന്നു. ഇരുവരെയും തിരുവല്ലയിലെ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ഇതിൽ സോമന്റെ നില ഗുരുതരമായി തുടരുകയാണ്.