ആലുവ: ആലുവ-പെരുമ്പാവൂർ ദേശസാത്കൃത റൂട്ടിൽ കുട്ടമശ്ശേരി പതിയാട്ട് കവലയ്ക്ക് സമീപം റോഡിലെ കുഴിയിൽ വീണ് സ്കൂട്ടർ മറിഞ്ഞ് തലയ്ക്ക് ഗുരുതരമായി പരിക്കേറ്റ് ചികിത്സയിലായിരുന്ന മാറമ്പിള്ളി കുന്നത്തുകരയിൽ കറുകുളം വീട്ടിൽ കുഞ്ഞുമുഹമ്മദ് (70) മരി​ച്ചു. ഇന്നലെ വൈകിട്ട് നാല് മണിയോടെ ആലുവ നജാത്ത് ആശുപത്രിയിലായി​രുന്നു മരണം.

ആഗസ്റ്റ് 20ന് രാവിലെ എട്ട് മണിയോടെ തോട്ടുമുഖത്തുള്ള മകളുടെ വീട്ടിൽ നിന്ന് മടങ്ങുമ്പോഴാണ് മഴവെള്ളം നിറഞ്ഞ കുഴിയിൽ ആക്ടീവ സ്കൂട്ടർ വീണത്. തലയ്ക്ക് ഗുരുതര പരിക്കേറ്റ കുഞ്ഞുമുഹമ്മദി​നെ നാട്ടുകാർ ആലുവയിലെ സ്വകാര്യ ആശുപത്രിയിലും തുടർന്ന് എറണാകുളം മെഡിക്കൽ ട്രസ്റ്റിലും പ്രവേശിപ്പിച്ചു. രണ്ടാഴ്ചയിലേറെ അബോധാവസ്ഥയി​ൽ തുടർന്നശേഷം നജാത്ത് ആശുപത്രിയിലേക്ക് മാറ്റുകയായിരുന്നു. സംസ്കാരം മാറമ്പിള്ളി ജുമാമസ്ജിദിൽ നടത്തി. ഭാര്യ: നബീസ. മക്കൾ: മനാഫ്, മൻസൂർ, റഷീദ, ബീവി. മരുമക്കൾ: അബ്ദുൾ അസീസ്, അസീസ്, റഷീദ, നിമി.

 കുഴി​യടച്ചത് നാട്ടുകാർ

അപകടം നടന്ന ദിവസം രാത്രി നാട്ടുകാർ പണം സ്വരൂപി​ച്ച് കോൺക്രീറ്റിട്ട് കുഴി മൂടിയിരുന്നു. ​റോഡ് കിഫ്ബിക്ക് കൈമാറിയതിനാൽ അറ്റകുറ്റപ്പണി നടത്താനാകില്ലെന്നാണ് പി.ഡബ്ളിയു.ഡി നിലപാട്.

ആലുവ - പെരുമ്പാവൂർ റൂട്ടി​ൽ തകർന്നുകി​ടക്കുന്ന തോട്ടുമുഖം - കുട്ടമശ്ശേരി - ചാലക്കൽ ഭാഗം നന്നാക്കാനായി​ ജനകീയ പ്രതിഷേധം ഉയർന്നപ്പോൾ 10 ലക്ഷം രൂപ ചെലവഴിച്ച് പി.ഡബ്ളിയു.ഡി കുറച്ചുഭാഗത്ത് അറ്റകുറ്റപ്പണി നടത്തിയിരുന്നു. അപ്പോഴും കുഞ്ഞുമുഹമ്മദി​ന്റെ ജീവനെടുത്ത പതിയാട്ട് കവലയിലെ കുഴി അടച്ചില്ല.

പിന്നാലെ റോഡ് വീണ്ടും തകർന്നത് അന്വേഷിക്കാൻ ഹൈക്കോടതി ഉത്തരവിട്ടു. അറ്റകുറ്റപ്പണി നാട്ടുകാർ തടഞ്ഞെന്ന വിചിത്രമായ റിപ്പോർട്ടാണ് വിജിലൻസ് മുമ്പാകെ പി.ഡബ്ളിയു.ഡി നൽകിയത്. യഥാർത്ഥത്തിൽ കുട്ടമശ്ശേരി ഭാഗത്തെ കുഴികൾ മൂടുന്നതിന് നാട്ടുകാരും തൊഴിലാളികൾക്കൊപ്പം ചേർന്നി​രുന്നു. ഒരാഴ്ച്യോളമായി കുട്ടമശ്ശേരിക്കാർ രാഷ്ട്രീയത്തിന് അതീതമായി സമരത്തിലാണ്. റോഡിൽ വാഴ നട്ടും വള്ളം ഇറക്കിയും പ്രതിഷേധിച്ചിരുന്നു.

 ചി​കി​ത്സാചെലവ് ആറ് ലക്ഷം

കുഞ്ഞുമുഹമ്മദിന്റെ ജീവൻ രക്ഷിക്കാൻ വീട്ടുകാർ ആശുപത്രിയിൽ മുടക്കിയത് ആറ് ലക്ഷത്തോളം രൂപ. കശുഅണ്ടി കച്ചവടക്കാരനായ കുഞ്ഞുമുഹമ്മദിന്റേത് ഇടത്തരം കുടുംബമാണ്. വീട്ടുകാർക്ക് പരാതിയില്ലാത്തതിനാൽ അപകടത്തി​ൽ പൊലീസ് കേസെടുത്തിട്ടില്ല.