കൊല്ലം: റെയിൽവേയുടെ ഒക്ടോബറിൽ പുറത്തിറങ്ങാനിരിക്കുന്ന പുതിയ സമയ പട്ടിക കൊല്ലം- ചെങ്കോട്ട പാതയ്ക്ക് പുത്തൻ പ്രതീക്ഷയേകുന്നു. കൊല്ലം- പുനലൂർ പാത വൈദ്യുതീകരണം പൂർത്തിയാവുകയും പുനലൂർ - ചെങ്കോട്ട
പാതയുടെ വൈദ്യുതീകരണം പുരോഗമിക്കുകയും ചെയ്യുന്ന സാഹചര്യത്തിലാണ് പുതിയ സമയ പട്ടിക പുറത്തുവരുന്നത്. വൈദ്യുതീകരിച്ച പാതയിലൂടെ കൂടുതൽ ട്രെയിനുകൾ ലഭ്യമാകുമെന്നാണ് യാത്രക്കാരുടെ പ്രതീക്ഷ. ഗുരുവായൂർ - പുനലൂർ ഇന്റർസിറ്റി എക്സ്പ്രസ് മധുരയിലേക്ക് നീട്ടണമെന്ന ആവശ്യം യാത്രക്കാർ വർഷങ്ങളായി ഉന്നയിക്കുന്നുണ്ട്. ഈ ആവശ്യം ഇതുവരെ പരിഗണിക്കപ്പെട്ടില്ല. കൂടാതെ പാലരുവി എക്സ്പ്രസ് തൂത്തുക്കുടിയിലേക്ക് നീട്ടണമെന്ന ആവശ്യവും ശക്തമായി ഉയരുന്നുണ്ട്. നിലവിൽ പ്രതിവാര എക്സ് പ്രസായി ഓടുന്ന എറണാകുളം- വേളാങ്കണ്ണി ദിവസവും ഓടിക്കണമെന്നും തിരുനൽവേലി- മംഗലാപുരം പ്രതിവാര തീവണ്ടി വേണമെന്നും ആവശ്യവും ശക്തമാണെങ്കിലും ഇതുവരെ പരിഗണിച്ചതായി സൂചനയില്ല. പുതിയ സാഹചര്യത്തിൽ ആവശ്യങ്ങളിൽ ചിലതെങ്കിലും പരിഗണിക്കപ്പെടുമെന്നാണ് പ്രതീക്ഷ.
കേരളത്തിന് തല്ല് ,
തമിഴ്നാടിന് തലോടൽ
കേരളത്തിലെ മലയോര മേഖലയിലെ ജനങ്ങളുടെ ആവശ്യങ്ങളോട് മുഖം തിരിക്കുമ്പോൾ തന്നെ തമിഴ്നാടിന്റെ ആവശ്യങ്ങൾ റെയിൽവേ മന്ത്രാലയം അനുഭാവ പൂർവം പരിഗണിക്കുന്നുണ്ട്. മധുര- പഴനി പാസഞ്ചറും പഴനി- കോയമ്പത്തൂർ പാസഞ്ചറും ഒരുമിപ്പിച്ച് മധുര- കോയമ്പത്തൂർ എക്സ് പ്രസ് തമിഴ്നാടിന് അനുവദിച്ചത് അടുത്ത കാലത്താണ്. ഇത് സംസ്ഥാനത്തിന് വലിയ നേട്ടമായി.
അതുപോലെ മധുര- ചെങ്കോട്ട പാസഞ്ചറും മയിലാടുതുറൈ- ദിണ്ടിഗൽ പാസഞ്ചറും ഒരുമിപ്പിച്ച് ചെങ്കോട്ട- മയിലാടുതുറൈ എക്സ്പ്രസായി സർവീസ് നടത്താനും തീരുമാനമായിട്ടുണ്ട്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |