ഏത് പ്രായക്കാരിലും കണ്ടുവരുന്ന ഒരു പ്രശ്നമാണ് നടുവേദന. ശരിയായ പൊസിഷനിൽ ഇരിക്കാത്തതുകൊണ്ടോ അല്ലെങ്കിൽ മറ്റെന്തെങ്കിലും പ്രശ്നങ്ങൾ കൊണ്ടോ ആവാം പൊതുവെ നടുവേദന വരുന്നത്. ശരീരത്തിനാവശ്യമായ വിശ്രമം ലഭിക്കുമ്പോൾ അല്ലെങ്കിൽ ചൂട് വെള്ളം ഉപയോഗിച്ച് ആവി പിടിക്കുന്നതിലൂടെ ഈ വേദന കുറയുന്നു. അതുകൊണ്ടുതന്നെ പലരും നടുവേദനയെ നിസാരമായി കാണുകയാണ്. എന്നാൽ ഇത് അത്ര നിസാരമായ പ്രശ്നമല്ല. നിങ്ങൾ ശ്രദ്ധിക്കാതെ പോകുന്ന ഈ നിസാര വേദന ചിലപ്പോൾ കാൻസറിന്റെ ലക്ഷണമാകാം. അതിനാൽ ഇടയ്ക്കിടെ നടുവേദന വരുമ്പോൾ സ്വയം ചികിത്സിക്കാൻ നിൽക്കരുത്. നടുവേദന പ്രാഥമിക ലക്ഷണമായി കാണുന്ന കാൻസറുകൾ ഏതൊക്കെയെന്ന് നോക്കാം.

മൂത്രാശയ കാൻസർ

ഇടയ്ക്കിടെ ഉണ്ടാകുന്ന അസഹനീയമായ നടുവേദന ചിലപ്പോൾ മൂത്രാശയ കാൻസറിന്റെ ലക്ഷണമാകാം. ഈ രോഗത്തിന്റെ മറ്റ് ലക്ഷണങ്ങളോടൊപ്പം നടുവേദനയും ഉണ്ടെങ്കിൽ ഉടൻ തന്നെ ചികിത്സ തേടുക.

സുഷുമ്ന

സുഷുമ്നയിലെ കാൻസറും നടുവേദനയ്ക്ക് കാരണമാകാം. ശരീരത്തിന്റെ മറ്റ് ഭാഗങ്ങളിലേയ്ക്ക് പടരാൻ സാദ്ധ്യതകുറവായ ഈ രോഗം അപൂർവമായാണ് ഉണ്ടാകുന്നത്. സുഷുമ്നയിൽ കാൻസർ വരുന്നതിന്റെ ആദ്യ ലക്ഷണമാണ് നടുവേദന. കാലക്രമേണ ഈ വേദന തീവ്രമാവുകയും ഇടുപ്പ്, കാലുകൾ എന്നിവിടങ്ങളിലേയ്ക്ക് വേദന വ്യാപിക്കുകയും ചെയ്യാം.

ശ്വാസകോശം

ശ്വാസകോശ കാൻസറിന്റെ ലക്ഷണങ്ങളിലൊന്നാണ് നടുവേദന. ഈ രോഗത്തിന്റെ മറ്റ് ലക്ഷണങ്ങളോടൊപ്പം നടുവേദനയും അനുഭവപ്പെടുന്നുണ്ടെങ്കിൽ ഉടൻ തന്നെ ഡോക്ടറെ കാണാൻ മറക്കരുത്.