ഒന്നര വർഷത്തിനകം 10 ലക്ഷം പേർക്ക് തൊഴിൽ
ന്യൂഡൽഹി: ഒന്നര വർഷത്തിനകം പത്തു ലക്ഷം യുവജനങ്ങൾക്ക് തൊഴിൽ നൽകുന്ന മഹാ റിക്രൂട്ട്മെന്റ് മേളയ്ക്ക് പ്രധാനമന്ത്രി നരേന്ദ്രമോദി 22ന് രാവിലെ 11ന് വീഡിയോ കോൺഫറൻസിലൂടെ തുടക്കം കുറിക്കും. രാജ്യത്തെമ്പാടും നിന്ന് റിക്രൂട്ട് ചെയ്ത 75,000 പേർക്ക് നിയമന ഉത്തരവും തത്സമയം നൽകും. ഇവരെ പ്രധാനമന്ത്രി അഭിസംബോധന ചെയ്യും.
നിയമനം കിട്ടുന്നവർ കേന്ദ്രസർക്കാരിന്റെ 38 മന്ത്രാലയങ്ങളിലും വകുപ്പുകളിലും ജോലിയിൽ പ്രവേശിക്കും. ഗ്രൂപ്പ് എ (ഗസറ്റഡ് ), ഗ്രൂപ്പ് ബി (ഗസറ്റഡ്), ഗ്രൂപ്പ് ബി ( നോൺ ഗസറ്റഡ് ), ഗ്രൂപ്പ് സി ഓഫീസർമാരായാവും നിയമനം.
കേന്ദ്രസായുധ സേനയിലേക്കും, സബ് ഇൻസ്പെക്ടർ, കോൺസ്റ്റബിൾ, എൽ. ഡി ക്ലാർക്ക്, സ്റ്റെനോ, പി. എ, ഇൻകംടാക്സ് ഇൻസ്പെക്ടർ, മൾട്ടി ടാസ്കിംഗ് സ്റ്റാഫ് തുടങ്ങിയ തസ്തികകളിലേക്കുമാണ് റിക്രൂട്ട്മെന്റ്.
ഇക്കൊല്ലം ജൂൺ ആദ്യം കേന്ദ്ര മന്ത്രാലയങ്ങളിലെയും വകുപ്പുകളിലെയും ജീവനക്കാരുടെ എണ്ണവും ഒഴിവുകളും അവലോകനം ചെയ്താണ് പ്രധാനമന്ത്രി നരേന്ദ്രമോദി, ഒന്നര വർഷത്തിനകം പത്ത് ലക്ഷം ഉദ്യോഗാർത്ഥികളെ പ്രത്യേക ദൗത്യമായി റിക്രൂട്ട് ചെയ്യാൻ നിർദ്ദേശിച്ചത്.
കാറ്റഗറിയും ഒഴിവുകളും
ഗ്രൂപ്പ് എ (ഗസറ്റഡ് ).................23,584
ഗ്രൂപ്പ് ബി (ഗസറ്റഡ്).................26,282
ഗ്രൂപ്പ് ബി (നോൺഗസറ്റഡ്)....92,525
ഗ്രൂപ്പ് സി.....................................8.36 ലക്ഷം
പ്രതിരോധ മന്ത്രാലയത്തിൽ
ഗ്രൂപ്പ് ബി (നോൺഗസറ്റഡ്).....39,366
ഗ്രൂപ്പ് സി.......................................2.14 ലക്ഷം
റെയിൽവേയിൽ
ഗ്രൂപ്പ് സി.....................................2.91 ലക്ഷം
കേന്ദ്ര ആഭ്യന്തര മന്ത്രാലയത്തിൽ
ഗ്രൂപ്പ് സി (നോൺഗസറ്റഡ്),ഗ്രൂപ്പ് ബി (നോൺഗസറ്റഡ്),ഗ്രൂപ്പ് സി എന്നിവയിൽ 1.21ലക്ഷം
സെലക്ഷൻ നടപടി ലളിതമാക്കി
പൗരന്മാരുടെ ക്ഷേമം ഉറപ്പാക്കാനും, യുവജനങ്ങൾക്ക് തൊഴിൽ നൽകാനുമുള്ള പ്രധാനമന്ത്രിയുടെ പ്രതിബദ്ധത നിറവേറ്റുന്ന സുപ്രധാന ദൗത്യമാണിതെന്നാണ് അദ്ദേഹത്തിന്റെ ഓഫീസ് അറിയിച്ചത്. മോദിയുടെ നിർദ്ദേശപ്രകാരം എല്ലാ മന്ത്രാലയങ്ങളും വകുപ്പുകളും നിലവിലുള്ള ഒഴിവുകൾ നികത്താനുള്ള ശ്രമത്തിലാണ്. മന്ത്രാലയങ്ങളും വകുപ്പുകളും സ്വന്തം നിലയിലും യു.പി.എസ്.സി, സ്റ്റാഫ് സെലക്ഷൻ കമ്മിഷൻ, റെയിൽവേ റിക്രൂട്ട്മെന്റ് ബോർഡ് തുടങ്ങിയ ഏജൻസികൾ വഴിയുമാണ് റിക്രൂട്ട്മെന്റ്. റിക്രൂട്ട്മെന്റ് വേഗത്തിലാക്കാൻ സാങ്കേതികവിദ്യയുടെ സഹായത്തോടെ സെലക്ഷൻ നടപടികൾ ലളിതമാക്കിയിട്ടുണ്ട്.
അപ്ഡേറ്റായിരിക്കാം ദിവസവുംഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |