ഉദിയൻകുളങ്ങര: അനധികൃതമായി മണ്ണിടിച്ചിൽ നടത്തിയ വാഹനങ്ങൾ പാറശാല പൊലീസ് പിടിച്ചെടുത്തു. പ്രദേശങ്ങളിൽ വ്യാപകമായ മണ്ണിടിച്ചിൽ നടക്കുന്നതായി ലഭിച്ച പരാതിയുടെ അടിസ്ഥാനത്തിൽ രാത്രികാലങ്ങളിൽ നടത്തിയ പരിശോധനകളിലാണ് മണ്ണിടിക്കൽ കണ്ടെത്തിയത്. വെള്ളിയാഴ്ച രാത്രിയിൽ വട്ടവിള കുന്നൻവിള ഭാഗത്ത് നടന്നുകൊണ്ടിരുന്ന അനധികൃത മണ്ണിടിച്ചിലിനിടയിൽ പൊലീസ് എത്തി മണ്ണിടിക്കാൻ ഉപയോഗിച്ച ജെ.സി.ബിയും മൂന്ന് ടിപ്പർ ലോറികളും പിടിച്ചെടുത്തു. ഇൻസ്‌പെക്ടർ ഹേമന്ത് കുമാർ.കെ, സബ് ഇൻസ്‌പെക്ടർമാരായ സജി.എസ്.എസ്,ബാലു,ഗോപിനാഥൻ,സിപിഒമാരായ സാജൻ, മെർലിൻ ജോയി എന്നിവരടങ്ങിയ സംഘമാണ് വാഹനങ്ങൾ പിടിച്ചെടുത്തത്.