ലോകം മുഴുവൻ ഖത്തർ ലോകകപ്പിന്റെ ആവേശത്തിലാണ്. ഇപ്പോഴിതാ ലോകകപ്പുമായി ബന്ധപ്പെട്ടുള്ള ചോദ്യത്തിന് രസകരമായ മറുപടി നൽകിയിരിക്കുകയാണ് പ്രമുഖ വ്യവസായി എം എ യൂസഫലി. കളി കാണാറുണ്ടോയെന്ന ചോദ്യത്തിന് 'ഗോൾ അടിക്കുന്ന ഭാഗം മാത്രമേ കാണാറുള്ളൂ. ഞാൻ എന്റെ ടീമിനോട് പറയും, ഗോൾ അടിക്കുന്ന ഭാഗം മാത്രമെടുത്ത് കാണിക്കാൻ'- എന്നായിരുന്നു അദ്ദേഹത്തിന്റെ മറുപടി.

ഫൈനൽ കാണാൻ ഖത്തറിലേക്ക് പോകുമെന്നും യൂസഫലി മാദ്ധ്യമങ്ങളോട് പറഞ്ഞു. ഏതാണ് ഇഷ്‌ട ടീമെന്ന ചോദ്യത്തിന് രസകരമായ മറുപടിയാണ് അദ്ദേഹം നൽകിയത്. 'ഫൈനൽ കാണാൻ പോകണം. എല്ലാവരും എന്റെ ടീമാണ്. ഒരു ബിസിനസുകാരന് പക്ഷം ചേരാൻ പറ്റില്ല. മനസിലുള്ളത് തുറന്നുപറയാൻ പാടില്ല.

എന്റെ പേരക്കുട്ടികൾ എതാ ഫേവറേറ്റ് ടീമെന്ന് ചോദിക്കാറുണ്ട്. നിങ്ങൾക്കേതാണോ ഫേവറേറ്റ് അതാണ് എന്റെയും ഫേവറേറ്റ് എന്നാണ് പറയാറ്.'- യൂസഫലി വ്യക്തമാക്കി.