സ്വർണത്തിന്റെ ഇറക്കുമതി ചുങ്കം ഗണ്യമായി കുറയ്‌ക്കുകയോ പൂർണമായി ഒഴിവാക്കുകയോ ആണ് സ്വർണക്കള്ളക്കടത്ത് നിരുത്സാഹപ്പെടുത്താനുള്ള മാർഗം . സ്വർണത്തിന് 15 ശതമാനമാണ് ഇറക്കുമതി തീരുവ.

800 -1000 ടൺ സ്വർണം ഓരോ വർഷവും ഇറക്കുമതി ചെയ്യുമ്പോൾ ഏകദേശം 65000 കോടി രൂപ നികുതിയായി ലഭിക്കുന്നു. കള്ളക്കടത്ത് നിരുത്സാഹപ്പെടുത്തുന്നതിന്റെ ഭാഗമായി ഇറക്കുമതി ചുങ്കം അഞ്ച് ശതമാനത്തിലേക്ക് കുറച്ചാൽ 21000 കോടി രൂപയോളമാണ് ലഭിക്കുക. 35 - 40 ലക്ഷം കോടി രൂപയുടെ ബജറ്റ് അവതരിക്കുന്ന രാജ്യത്ത് അഞ്ച് ശതമാനത്തിലേക്ക് എത്തിക്കുമ്പോഴുണ്ടാകുന്ന വരുമാന നഷ്ടം ഗുണഫലങ്ങൾ താരതമ്യം ചെയ്യുമ്പോൾ വലിയൊരു നഷ്ടമല്ല. കള്ളക്കടത്തിൽ പിടിക്കപ്പെടുന്ന സ്വർണം കണ്ടുകെട്ടുകയും കള്ളക്കടത്ത് രാജ്യദ്രോഹമായി കണക്കാക്കി കടത്തുകാരെ ജാമ്യമില്ലാ വകുപ്പ് ചേർത്ത് ജയിലിടക്കുകയും ചെയ്താൽ കള്ളക്കടത്ത് താനെ ഇല്ലാതാകും.

ഇന്ത്യയിലേക്ക് ഇറക്കുമതി ചെയ്യുന്ന സ്വർണത്തിന് നിലവിൽ 15 ശതമാനം തീരുവയും നികുതിയും ആവശ്യമാണ്. (+ 3 ശതമാനം ജി.എസ്.ടി ) പ്രത്യക്ഷത്തിൽ ഈ നടപടികൾ കറന്റ് അക്കൗണ്ട് കമ്മി കുറയ്ക്കുന്നതിനും കറൻസിയെ ശക്തിപ്പെടുത്താനും വേണ്ടിയുള്ളതായിരുന്നു, എന്നാൽ ഇത് കള്ളക്കടത്ത്, ഹവാല ഇടപാടുകൾ, സമാന്തര സമ്പദ്‌വ്യവസ്ഥയുടെ വളർച്ച എന്നിവയ്ക്ക് ആക്കംകൂട്ടി. ഒരു കിലോ സ്വർണ്ണം കള്ളക്കടത്തായി ഇന്ത്യയിലെത്തുമ്പോൾ ഏകദേശം എട്ടുലക്ഷം രൂപയിൽ അധികം നേട്ടമാണ് ലഭിക്കുക. ഇതാണ് ആളുകളെ ഈ മേഖലയിലേക്ക് ആകർഷിക്കുന്നത്. ഈ സാഹചര്യം ആഭ്യന്തരമായും അന്തർദേശീയമായും സംഘടിതമേഖലയുടെ വ്യാപാരത്തെ ഗണ്യമായി ഇല്ലാതാക്കുന്നു, അതുവഴി വ്യവസായത്തിന്റെ വളർച്ചാ സാദ്ധ്യതകളെ പരിമിതപ്പെടുത്തുന്നു.

ജി.എസ്.ടി നടപ്പാക്കൽ ജ്വല്ലറി വ്യവസായത്തെ നിയമവിധേയമാക്കുന്നതിൽ നല്ല സ്വാധീനം ചെലുത്തിയതിനാൽ, അവശേഷിക്കുന്ന പ്രധാനതടസം ഇറക്കുമതിയിലെ അമിതമായ നികുതിഘടനയാണ്. അതിനാൽ, ചരക്കുകളുടെ കാര്യക്ഷമമായ ഒരു ടൂവേ ട്രാൻസ്‌ഫർ കൊണ്ടുവരുന്നതിന്, അന്താരാഷ്ട്ര വിലകൾക്കൊപ്പം ആഭ്യന്തരവിലകൾ നേടുന്നതിനുള്ള നടപടികളും കൈക്കൊള്ളണം.
ഇത് വിജയകരമാകണമെങ്കിൽ അധിക നികുതികളും തീരുവകളും ലെവികളും നിറുത്തലാക്കേണ്ടതുണ്ട്. സ്വർണ ഇറക്കുമതിക്കുള്ള ഡോളർ കരുതൽ ശേഖരത്തെ ആശ്രയിക്കുന്നത്, ഇന്ത്യൻ കറൻസിയിൽ സ്വർണത്തിനുള്ള പണമടയ്ക്കലിനുള്ള സംവിധാനമേർപ്പെടുത്തി അതുവഴി നികുതി ഇളവുകൾ, ടാക്സ് ബ്രേക്കുകൾ എന്നിവയും സർക്കാർ പ്രോത്സാഹിപ്പിക്കണം.
സ്വർണത്തിന്റെ ഇറക്കുമതിയും കയറ്റുമതിയും സ്വതന്ത്രമായോ കുറഞ്ഞ നിയന്ത്രണങ്ങളോടെയോ നടത്താൻ അനുവദിക്കുന്ന ഒരു സ്വതന്ത്ര വിപണിയിലേക്കുള്ള ക്രമാനുഗതമായ നീക്കത്തിന് ഇത് സഹായകമാകും. ഈ നടപടിയിലൂടെ ഇന്ത്യ ആഗോളവില നിശ്ചയിക്കുന്ന രാജ്യമായി മാറും. സാമ്പത്തിക പ്രവർത്തനങ്ങളിൽ ശതകോടികൾ കൂട്ടിച്ചേർക്കാനും കഴിയും.

സ്വർണത്തിന്റെ കള്ളക്കടത്തും, നികുതി വെട്ടിപ്പും ഇല്ലാതാക്കാനും അതുവഴി മുഴുവൻ ഇന്ത്യൻ കുടുംബങ്ങളെയും അവർ കൈവശം വച്ചിരിക്കുന്ന 25000 - 30000 ടൺ സ്വർണ ശേഖരത്തെയും തുറന്ന സമ്പദ് വ്യവസ്ഥയിലേക്ക് കൊണ്ടുവരാനും കഴിയും.

( ലേഖകൻ ഓൾ കേരള ഗോൾഡ് & സിൽവർ മർച്ചന്റ്സ് അസോസിയേഷൻ ട്രഷററും ഓൾ ഇൻഡ്യ ജം ആന്റ് ജുവലറി ഡൊമസ്റ്റിക് കൗൺസിൽ ദേശീയ ഡയറക്ടറുമാണ് )