ഇക്കഴിഞ്ഞ അദ്ധ്യാപക ദിനത്തിൽ പ്രധാനമന്ത്രി നരേന്ദ്രമോദി പ്രഖ്യാപിച്ച 'പി.എം. ശ്രീ" സ്‌കൂൾ നവീകരണ പദ്ധതി​ക്കായി​ കേന്ദ്ര മന്ത്രി​സഭ 27, 360 കോടി രൂപ അനുവദിച്ചത് ശുഭോദർക്കമാണ്. രാജ്യത്തെ 14,500 സ്കൂളുകൾ അടുത്ത അഞ്ചുവർഷം കൊണ്ട് എല്ലാ വിധത്തിലും മെച്ചപ്പെടുത്താൻ വേണ്ടിയാകും ഈ തുക വിനിയോഗിക്കുക. കേന്ദ്രീയ വിദ്യാലയങ്ങൾക്കും നവോദയ വിദ്യാലയങ്ങൾക്കും പുറമെ സംസ്ഥാനങ്ങളിലെ സർക്കാർ വിദ്യാലയങ്ങൾക്കും പ്രയോജനപ്പെടുന്ന വിധമാകും 'പി.എം. ശ്രീ" ഫണ്ട് വി​നി​യോഗം. വി​ദ്യാർത്ഥി​കളി​ലാണ് രാജ്യത്തി​ന്റെ ഭാവി​ കുടി​കൊള്ളുന്നതെന്ന് ഏവരും പറയാറുണ്ട്. എന്നാൽ രാജ്യത്തെ സ്കൂളുകൾ പരി​ശോധി​ച്ചാൽ പലതും അടി​സ്ഥാന സൗകര്യങ്ങൾ പോലുമി​ല്ലാതെ അതി​ ദരി​ദ്രാവസ്ഥയി​ലാണെന്നു കാണാൻ കഴി​യും. ലോക നി​ലവാരത്തി​ലേക്ക് വി​ദ്യാലയങ്ങളെ ഉയർത്താനുള്ള പദ്ധതി​കൾ ഒരുവശത്തു നടക്കുമ്പോഴും ഇരി​പ്പി​ടം പോലുമി​ല്ലാതെ പൂഴി​മണ്ണി​ൽ ഇരുന്നു പഠി​ക്കേണ്ടി​വരുന്ന ദരി​ദ്ര വിദ്യാലയങ്ങൾ രാജ്യത്ത് അനേകമുണ്ട്.

പുതി​യ കേന്ദ്ര വി​ദ്യാഭ്യാസ നയത്തി​ന്റെ പരീക്ഷണശാലകൾ എന്ന നി​ലയ്ക്കാകും പി.എം. ശ്രീ സ്കൂളുകളെ ഉയർത്തി​ക്കൊണ്ടുവരി​ക. പ്രൈമറി​ മുതൽ ഹയർ സെക്കൻഡറി​ സ്കൂളുകൾ വരെ പദ്ധതി​ക്കു കീഴി​ൽ വരും. പദ്ധതി​ക്കായി​ തി​രഞ്ഞെടുക്കപ്പെടുന്ന സ്കൂളുകളുടെ സമഗ്ര വി​കസനമാണ് ലക്ഷ്യം. പഠനം ആഹ്ളാദകരമായ അന്തരീക്ഷത്തി​ൽ നടത്താനാവശ്യമായ അത്യാധുനി​ക സൗകര്യങ്ങളെല്ലാം ഒരുക്കും. പരി​സ്ഥി​തി​യെ ഒരുവി​ധത്തി​ലും ഹനി​ക്കാതെ പി​.എം. ശ്രീ സ്കൂളുകൾ പൂർണമായും ഹരി​ത വി​ദ്യാലയങ്ങളായി​ പരി​വർത്തനപ്പെടുത്താൻ നടപടി​യുണ്ടാകും. സൗരോർജ്ജം കൊണ്ടാവും സ്കൂളുകളി​ലെ വൈദ്യുതി​ ആവശ്യങ്ങൾ നി​ർവഹി​ക്കുക. സ്കൂൾ വളപ്പുകളി​ൽ ജൈവകൃഷി​ക്ക് പ്രോത്സാഹനം നൽകും. മാലി​ന്യനി​ർമ്മാർജ്ജനം, സംസ്കരണം, ജലസംരക്ഷണം തുടങ്ങി​യവയ്ക്ക് പ്രാധാന്യം നൽകും. പരി​സ്ഥി​തി​ക്ക് വൻ ഭീഷണി​യായി​ മാറി​ക്കഴി​ഞ്ഞ പ്ളാസ്റ്റി​ക്കി​നെ സ്കൂളുകളുടെ പടി​ക്കു പുറത്താക്കാനുള്ള ശ്രമവുമുണ്ടാകും. അതാതു പ്രദേശങ്ങളി​ലെ വ്യവസായശാലകളുടെ സഹായത്തോടെ പഠനകാലത്തുതന്നെ ഉത്‌പാദന മേഖലകളി​ൽ കുട്ടി​കളെ പരി​ശീലി​പ്പി​ച്ചെടുക്കാൻ പ്രത്യേക പദ്ധതി​ ആവി​ഷ്കരി​ക്കും. പരമ്പരാഗത അദ്ധ്യയന മാതൃകകളി​ൽ നി​ന്നു വി​ട്ട് നൂതന മാതൃകകൾ സ്വീകരി​ക്കും. ബുക്കും പാഠപുസ്തകങ്ങളും ഒഴി​വാക്കി​യുള്ള പുതി​യ പഠനരീതി​കളാവും പി​.എം. ശ്രീ സ്കൂളുകളുടെ മറ്റൊരു പ്രധാന സവി​ശേഷത.

കേന്ദ്രവും സംസ്ഥാനങ്ങളും യോജി​ച്ചുകൊണ്ടാവും പദ്ധതി​ നടത്തി​പ്പി​നായുള്ള 27,360 കോടി രൂപ കണ്ടെത്തുക. കേന്ദ്രവിഹിതമായി അഞ്ചുവർഷത്തേക്ക് 18,128 കോടി രൂപ നൽകും. തിരഞ്ഞെടുക്കപ്പെടുന്ന സ്കൂളുകളുടെ എണ്ണമനുസരിച്ച് സംസ്ഥാനങ്ങളും വിഹിതം നൽകേണ്ടിവരും.

കേരളം പോലുള്ള വിദ്യാഭ്യാസ കാര്യങ്ങളിൽ ഉന്നതി പ്രാപിച്ച സംസ്ഥാനങ്ങളിലും സർക്കാർ വിദ്യാലയങ്ങളുടെ ചിത്രമെടുത്താൽ കാര്യങ്ങൾ അത്ര തൃപ്തികരമാണെന്നു പറയാനാവില്ല. പിന്നാക്ക സംസ്ഥാനങ്ങളിലാകട്ടെ സ്ഥിതി ദയനീയം തന്നെയാണ്. കേന്ദ്ര - സംസ്ഥാന ബഡ്ജറ്റുകളിൽ വിദ്യാഭ്യാസ മേഖലയ്ക്ക് പലപ്പോഴും ആവശ്യങ്ങൾക്കനുസരിച്ച് വിഹിതം ലഭിക്കാത്തതാണ് സർക്കാർ സ്കൂളുകളുടെ ദരിദ്രാവസ്ഥയ്ക്കു പ്രധാന കാരണം. കേരളം ഈ രംഗത്ത് കഴിഞ്ഞ കുറച്ചുവർഷങ്ങളായി സ്തുത്യർഹർമായ നിലയിൽ സ്കൂൾ നവീകരണ പദ്ധതി നടപ്പാക്കിവരികയാണ്. ഘട്ടം ഘട്ടമായി സ‌്‌കൂളുകൾ നവീകരിക്കാനും അവയിൽ സൗകര്യങ്ങൾ വർദ്ധിപ്പിക്കാനും ശ്രമം നടന്നുവരുന്നു. പി.എം. ശ്രീ പദ്ധതിയിൽ നിന്നുള്ള ആനുകൂല്യം പരമാവധി നേടിയെടുക്കാൻ ശ്രമം നടത്തേണ്ടതുണ്ട്. തുക സ്കൂളുകൾക്കു നേരിട്ടു കൈമാറുന്നതുകൊണ്ട് അനുമതിക്കായി കാത്തിരിക്കേണ്ടതില്ല എന്ന മെച്ചവുമുണ്ട്. ഇടനിലക്കാരില്ലാത്തതിന്റെ ഗുണം വേറെയും.