പുതുവർഷത്തിൽ കേരളത്തിലെ വനിതകളെ മതിലാക്കി മാറ്റിയ പിണറായി അക്കാര്യത്തിൽ വിജയിച്ചു

Sunday 06 January 2019 9:37 PM IST
news

ശബരിമലയേയും അയ്യപ്പനേയും തകർക്കാൻ ശ്രമിക്കുന്ന കേരളത്തിലെ പിണറായി സർക്കാരിന് എതിരെ ബി.ജെ.പി കുറെ നാളായി സമരം ചെയ്യുന്നുണ്ട്. പക്ഷേ ഒന്നും അങ്ങോട്ട് ഏൽക്കുന്ന ലക്ഷണമില്ലായിരുന്നു. അതിനിടെയിലാണ് പിണറായി ഒരു ചെറിയ പണി നടത്തിയത്. ബിന്ദുവിനെയും കനക ദുർഗയേയും മലകയറ്റി. അതോടെ ഭക്തപുത്രൻമാർ ഉണർന്നു. ഇരട്ടച്ചങ്കുള്ള പിണറായി പോലും പേടിച്ചുവിരണ്ട് പോയ കാഴ്ചകളാണ് പിന്നീട് കേരളം കണ്ടത്. ഭക്തൻമാരെ മതിലു കെട്ടി മാറ്റി നിറുത്തിയ ശേഷം രണ്ട് മാളികപ്പുറങ്ങളെ മലകയറ്റിയ വിശേഷങ്ങളുമായി കൗമുദി ട്രെൻഡിംഗ് ന്യൂസ് തുടങ്ങട്ടെ. നമസ്‌കാരം ഞാൻ ശ്രീജിത്ത് ബാലകൃഷ്ണൻ.

പുതുവർഷത്തിൽ കേരളത്തിലെ വനിതകളെ മതിലാക്കി മാറ്റിയ പിണറായി അക്കാര്യത്തിൽ വിജയിച്ചു. മതിലു കെട്ടിയാൽ നവോത്ഥാനം വരും എന്ന് പിണറായി പറഞ്ഞപ്പോ ഇത്ര പെട്ടെന്ന് വരുമെന്ന് ആരും നിരീച്ചുകാണില്ല. 55 ലക്ഷം വനിതകളെ അണിനിരത്തിയ മതിൽ റെക്കാഡ് ആണെന്നാണ് മതിലുകാണാൻ വന്ന വിദേശികൾ പറയുന്നത്. അതു പോട്ടെ.. മതില് കെട്ടി അതിന്റെ മറവിൽ അതീവ രഹസ്യമായി രണ്ട് വനിതാ രത്നങ്ങളെ ശബരിമല കയറ്റിയപ്പോ പിണറായിക്ക് ആശ്വാസം. കോടതി പറഞ്ഞതുകൊണ്ട് ഭരണഘടന സംരക്ഷിച്ചതിന്റെ മറ്റൊരു ആശ്വാസം കൂടി അദ്ദേഹത്തിന് കിട്ടി. ഇരുമുടിക്കെട്ടില്ലാതെ ശരണപാത വഴി പതിനെട്ടാം പടി കയറാതെ ബിന്ദുവും കനകദുർഗയും സന്നിധാനത്ത് എത്തി പുലർച്ചെ അയ്യപ്പനെ കണ്ടു. സന്നിധാനത്ത് ഫുൾടൈം കാവൽ ഉണ്ടായിരുന്ന പൊലീസ് അയ്യപ്പൻമാർ പോലും സംഭവം അറിഞ്ഞത് നേരെ വെളുത്തപ്പോഴാണ്. ഭരണഘടനയോടും കോടതി വിധിയോടും അഗാധമായ കൂറുള്ള പിണറായി സഖാവ് ജനുവരി രണ്ടിന് നേരം വെളുത്തപ്പോ യുവതികൾ അയ്യപ്പനെ കണ്ട കാര്യം സ്ഥിരീകരിച്ചു. അത് കേട്ട പാടെ തന്ത്രിയും മേൽശാന്തിയും കൂടി അയ്യപ്പന് ശുദ്ധികലശം നടത്തി. ശുദ്ധികലശം നടത്തിയാ പിന്നെ അയ്യപ്പൻ ഓകെയാണ്. പിന്നെയും യുവതികൾക്ക് വരാം... അയ്യപ്പനെ കാണാം. ശുദ്ധികലശം നടത്തിയാ മതി.

സന്നിധാനത്ത് യുവതികൾ കയറിയാൽ ആത്മഹത്യ ചെയ്യും എന്ന് പറഞ്ഞവരും അയ്യപ്പനെ കാണാൻ യുവതികൾ എത്തിയാൽ പ്ലാൻ ബി പ്രകാരം മറ്റേ കാര്യം സാധിക്കും എന്ന് പറഞ്ഞവരും ഇപ്പോ എവിടെയാണോ ആവോ?... ഏറ്റവും ഒടുവിൽ ശശികല എന്ന പേരുള്ള ശ്രീലങ്കൻ യുവതി മലകയറി അയ്യപ്പനെ കണ്ടപ്പോൾ ആത്മഹത്യ ചെയ്യും എന്ന് പറഞ്ഞ ശശികല, പിണറായിക്ക് നല്ലത് വരാൻ വേണ്ടി പ്രാർത്ഥിക്കുക ആയിരുന്നു. ശശികല അയ്യപ്പനെ കണ്ടപ്പോൾ അയ്യപ്പന് ശുദ്ധികലശം വേണ്ട എന്നാണ് തന്ത്രി പറയുന്നത്. ഇതിനിടെ ഒൻപത് യുവതികൾ മലകയറി അയ്യപ്പനെ കണ്ടു എന്നാണ് സർക്കാരിന്റെ കണക്ക്. ഇനി കയറാൻ റെഡി ആയി നിൽക്കുന്നവരുടെ കണക്ക് പുറത്തുവിട്ടിട്ടില്ല. പക്ഷേ പിണറായിയുടെ പോക്ക് കണ്ടിട്ട് തന്ത്രി എന്നും വൈകിട്ട് ശുദ്ധികലശം നടത്തി നട അടയ്‌ക്കേണ്ടി വരുമെന്നാണ് തോന്നുന്നത്. യുവതി മലകയറിയതിന്റെ പേരിൽ നട അടച്ച് ശുദ്ധികലശം നടത്തിയ തന്ത്രിയെ മാറ്റാൻ വഴിയുണ്ടോ എന്നും സർക്കാർ അന്വേഷിക്കുന്നുണ്ട്.

കേരളത്തിന്റെ തെരുവുകൾ അക്രമികൾക്ക് കൈമാറിയിട്ട് പൊലീസുകാർ മാറി നിന്ന് കളി കണ്ടു. പതിവുപോലെ ശബരിമലയുടെ പേരിൽ അഞ്ചാമത്തെ ഹർത്താൽ പ്രഖ്യാപിച്ച് ശബരിമല കർമ്മ സമിതി അയ്യപ്പനോടുള്ള ഭക്തി കൂടുതൽ ശക്തമാക്കി. ഹർത്താൽ എന്ന് കേട്ട പാടെ താമരപ്പാർട്ടിയുടെ സംസ്ഥാന അദ്ധ്യക്ഷൻ പിള്ള വക്കീൽ പഴയ പ്രസ്താവന വീണ്ടും പുറത്തിറക്കി. ഇതൊരു സുവർണാവസരമാണ്. പണ്ട് പറഞ്ഞ അതേ... സുവർണാവസരം. പിന്നെ കേരളം കണ്ടത്, മതിലിന് അപ്പുറത്തെ ഹർത്താൽ കാഴ്ചകളാണ്. കേരളത്തിന്റെ തെരുവുകളിൽ മൂന്നു ദിവസം നീണ്ടു നിന്ന അയ്യപ്പ സ്‌നേഹ ഹർത്താലിൽ സർക്കാർ വാഹനങ്ങൾ, ഓഫീസുകൾ, രാഷ്ട്രീയ പാർട്ടി ഓഫീസുകൾ, നേതാക്കൻമാരുടെ വീടുകൾ എന്നിവ അടക്കം സകലതും കത്തിച്ചു. പാലക്കാട്ട് വായനശാല അടിച്ചുതകർത്തപ്പോൾ തിരുവനന്തപുരത്ത് സ്‌കൂളിൽ നിന്ന് നാല് ബോംബ് കിട്ടി. അങ്ങനെ അയ്യപ്പ വിശ്വാസത്തിന്റെ പേരിൽ കേരളം കൂടുതൽ പ്രബുദ്ധമായി. ഹർത്താലിന് എതിരെ പ്രതിഷേധവുമായി രംഗത്ത് വന്ന വ്യാപാരികളാണ് സത്യത്തിൽ വെട്ടിലായത്. ഇനിയൊരു ഹർത്താൽ സഹിക്ക വയ്യാതെ ഒരു ആവേശത്തിന് തുറന്ന കടകൾ, ഇനി ഒരിക്കലും തുറക്കാൻ പറ്റാത്ത സ്ഥിതിയിലേക്ക് മാറ്റിയാണ് ഭക്തപുത്രൻമാർ ഹർത്താൽ ആഘോഷിച്ചത്. സംഘടിതവും ആസൂത്രിതവുമായ ആൾക്കൂട്ട ആക്രമണം കേരളത്തെ വലിയ ഭയപ്പാടിലാക്കി. ഒരു വശത്ത് അയ്യപ്പ ഭക്തൻമാരും മറുവശത്ത് പിണറായി ഭക്തൻമാരും സംഘടിച്ചപ്പോൾ നടുവിൽ നിന്ന പൊലീസുകാരും മാദ്ധ്യമപ്രവർത്തകരും കിട്ടാവുന്നത് മുഴുവൻ ഏറ്റുവാങ്ങി. മാദ്ധ്യമപ്രവർത്തകരെ കണ്ടാൽ കലിയിളകിയ പോത്തിനെ പോലെ ഓടി നടക്കുക ആയിരുന്നു കേരളത്തിലെ ഭക്തൻമാർ. വിശ്വാസം സംരക്ഷിക്കാൻ ബോംബുമായി കേരളം മുഴുവൻ ഓടി നടന്ന ഭക്തപുത്രൻമാരാണ് യഥാർത്ഥ ഹീറോസ്.

ശബരിമലയെ തകർക്കാൻ ശ്രമിക്കുന്ന പിണറായിക്ക് എതിരായ സമരം ഉദ്ഘാടനം ചെയ്യാൻ പ്രധാനമന്ത്രി മോദിജി കേരളത്തിലേക്ക് വരുന്നു അത്രേ... ശബരിമലയിലെ ആചാരം സംരക്ഷിക്കണം എന്ന് മോദി അങ്ങ് ഡൽഹിയിൽ തറപ്പിച്ച് പറഞ്ഞതോടെ ഭക്തൻമാർക്ക് പിന്നെ എന്തും ആകാം എന്ന അവസ്ഥയായി. അതിനിടെ, കോടതി വിധി മാനിക്കാൻ സർക്കാർ തയ്യാറാകണം എന്ന് മോദിജിയുടെ മുരളീധര എം.പി എവിടെയോ പറയുന്നത് ചില മാദ്ധ്യമങ്ങൾ പുറത്തുവിട്ടു. കേരളത്തിൽ വരുമ്പോ ആചാരം സംരക്ഷിക്കണം. കേരളം വിട്ടാൽ കോടതി വിധി മാനിക്കണം. ഇതാണ് താമര ലൈൻ.

സന്നിധാനത്ത് ഒരു ബലിദാനിക്ക് വേണ്ടി സകല അടവും പയറ്റിയിട്ടും കിട്ടാതിരുന്ന ബി.ജെ.പിക്ക് അയ്യപ്പൻ കളിച്ചുവളർന്ന പന്തളത്ത് ഒരു ബലിദാനിയെ കിട്ടി. അത് സംഭാവന ചെയ്ത സി.പി.എമ്മുകാരോട് ബി.ജെ.പി എന്നും കടപ്പെട്ടിരിക്കും. പക്ഷേ ഭക്തപുത്രൻമാർ എന്ത് ചെയ്താലും അത് സിസിടിവിയിൽ വരും. സിസി ടിവി ആദ്യം ചതിച്ചത് ബി.ജെ.പി നേതാവ് കെ. സുരേന്ദ്രനെയാണ്. ആ ഭക്തൻ ഇരുമുടിക്കെട്ട് വലിച്ചെറിയുന്ന ദൃശ്യം സിസിടിവി കണ്ടതു കൊണ്ട് പിണറായി രക്ഷപ്പെട്ടു. ഏറ്റവും ഒടുവിൽ സിസിടിവിയിൽ കണ്ടത് നെടുമങ്ങാട്ട് മറ്റൊരു ഭക്തൻ പൊലീസ് സ്റ്റേഷനിലേക്ക് ബോംബ് എറിയുന്നതാണ്. ഇനിയെങ്കിലും സിസിടിവി ഇല്ലാത്ത സ്ഥലത്ത് പോയി വേണം ബോംബ് എറിയാൻ എന്ന് ശാഖയിൽ നിന്ന് നിർദ്ദേശം കൊടുക്കണം. സുകുമാരൻ നായർ എന്ന നായരോട് കേരളത്തിലെ നായന്മാർക്ക് വലിയ മതിപ്പുണ്ടായിരുന്നില്ല. എന്നാൽ പിണറായി പറയുന്നതിന് തറുതല പറയുന്ന പെരുന്ന നായരോട് ഇപ്പോ പിള്ള വക്കീൽ അടക്കമുള്ളവർക്ക് പെരുത്ത സ്‌നേഹമാണ്. മതിലു പണിക്ക് പോകാതിരുന്ന പെരുന്ന നായർക്ക് പന്തളം കൊട്ടാരം, തന്ത്രി എന്നൊക്കെ കേട്ടാൽ മുണ്ടഴിച്ച് കൈകൂപ്പി നിൽക്കുന്ന പഴയ കാല സ്വഭാവം തികട്ടി വരും. അതേ വികാരം തന്നെയാണ് കോൺഗ്രസ് നായരായ ചെന്നിത്തലാജിക്കും. ശബരിമല വിഷയത്തിൽ സി.പി.എമ്മും ബി.ജെ.പിയും ചേർന്ന് കേരളം വീതിച്ചെടുത്തപ്പോൾ അതിന്റെ എച്ചിൽ കഷണം എങ്കിലും കിട്ടുമോ എന്നാണ് രമേശ് ചെന്നിത്തലാജി നോക്കുന്നത്. ശബരിമലയിൽ യുവതിയെ കയറ്റിയപ്പോ ചെന്നിത്തലയുടെ ഹൃദയം ഒന്നു പിടഞ്ഞു. പിന്നെ അത് ഉണർന്നു. ശബരിമല കർമ്മ സമിതി ഹർത്താൽ പ്രഖ്യാപിച്ചില്ലെങ്കിൽ ചെന്നിത്തല ഹർത്താൽ പ്രഖ്യാപിക്കും ആയിരുന്നു. ബി.ജെ.പി ഹർത്താലിന് പിന്തുണ പ്രഖ്യാപിച്ചപ്പോ, അന്നേ ദിവസം യൂത്ത് കോൺഗ്രസുകാർ മുഖ്യമന്ത്രിയെ വഴിയിൽ തടയാൻ ശ്രമിച്ചു. എല്ലാം കോൺഗ്രസിന്റെ നല്ലതിന് എന്നേ പറയാനുള്ളൂ...

പുതുവർഷം ഇത്രേം ഭംഗിയാകും എന്ന് ഒട്ടും പ്രതീക്ഷിച്ചതല്ല, മോദിജിയുടെ നോട്ട് നിരോധനത്തിന്റെ ബാക്കിയായ പുതിയ 2000 രൂപയുടെ അച്ചടി കേന്ദ്രം കുറച്ചതാണ് ആരും ശ്രദ്ധിക്കാതെ പോയ ഒരു സംഭവം. കള്ളനോട്ട് തടയാനാണ് 500, 1000 നോട്ടുകൾ പിൻവലിച്ച് 2000 കൊണ്ടുവന്നത്. മോദിജിയുടെ ഭക്തൻമാർ തന്നെ 2000 അച്ചടിച്ച് ഇറക്കാൻ തുടങ്ങിയപ്പോ പിന്നെ അതും രക്ഷയില്ലാതായി. അയ്യപ്പന്റെ ബ്രഹ്മചര്യം കാത്തു സൂക്ഷിക്കാൻ വേണ്ടി അടുത്ത ഹർത്താൽ ആചാരവും ബോംബേറും കാണാൻ കൊതിച്ചുകൊണ്ട് ഇന്നത്തേക്ക് വിടപറയുന്നു. അടുത്തയാഴ്ച വീണ്ടും കാണും വരെ എല്ലാവർക്കും നല്ല നമസ്‌കാരം.

ഇവിടെ കൊടുക്കുന്ന അഭിപ്രായങ്ങൾ കേരള കൗമുദിയുടെതല്ല. സോഷ്യൽ നെറ്റ്‌വർക്ക് വഴി ചർച്ചയിൽ പങ്കെടുക്കുന്നവർ അശ്ലീലമോ അസഭ്യമോ തെറ്റിദ്ധാരണാജനകമോ അപകീർത്തികരമോ നിയമവിരുദ്ധമോ ആയ അഭിപ്രായങ്ങൾ പോസ്റ്റ്‌ ചെയുന്നത് സൈബർ നിയമപ്രകാരം ശിക്ഷാർഹമാണ്.
POPULAR IN VIDEOS
YOU MAY LIKE IN VIDEOS