വാഷിംഗ്ടൺ: അമേരിക്കൻ സെനറ്റംഗവും മുൻ പ്രസിഡ‌ന്റ് സ്ഥാനാർത്ഥിയുമായ ജോൺ മക്കെയ്ൻ അന്തരിച്ചു. 81 വയസായിരുന്നു. തലച്ചോറിലെ ട്യൂമർ ഗുരുതരമായതിനെ തുടർന്നായിരുന്നു അദ്ദേഹത്തിന്റെ അന്ത്യം. ജോൺ സിഡ്നി മക്കെയ്ൻ മൂന്നാമൻ എന്നറിയപ്പെടുന്ന മക്കെയ്ൻ അരിസോണയിൽനിന്നുള്ള സെനറ്റംഗമായിരുന്നു. 2008ലാണ് അമേരിക്കൻ പ്രസിഡന്റ് തിരഞ്ഞെടുപ്പിൽ റിപ്പബ്ലിക്കൻ പാർട്ടിയുടെ സ്ഥാനാർത്ഥിയായി മത്സരിച്ചത്.  

1958ൽ യു.എസ്. നാവിക അക്കാഡമിയിൽ നിന്നും ബിരുദം നേടിയ മക്കെയ്ൻ നാവികസേനയിൽ പൈലറ്റായി ജോലിയിൽ പ്രവേശിച്ചു. വിയറ്റ്‌നാം യുദ്ധകാലത്തെ ഫൈറ്റർ പൈലറ്റായിരുന്നു അദ്ദേഹം. 1981ൽ ക്യാപ്ടൻ പദവിയിലിരിക്കെ നാവികസേനയിൽ നിന്നും വിരമിച്ചു. പിന്നീട് രാഷ്ട്രീയ ജീവിതത്തിന് തുടക്കമിട്ടു. 1982ൽ യു.എസ്. പ്രതിനിധി സഭയിലേക്ക് തിരഞ്ഞെടുക്കപ്പെട്ടു. 1986ൽ യു.എസ്. സെനറ്റിൽ അംഗമായ മക്കെയ്ൻ 1992, 1998, 2004 വർഷങ്ങളിലെ തിരഞ്ഞെടുപ്പുകളിലും  വിജയിച്ചു.

2000ത്തിൽ റിപ്പബ്ലിക്കൻ പ്രസിഡന്റ് സ്ഥാനാർത്ഥിത്വത്തിനായി മത്സരിച്ചെങ്കിലും പരാജയപ്പെട്ടു. 2008ൽ നടന്ന പൊതുതിരഞ്ഞെടുപ്പിൽ റിപ്പബ്ലിക്കൻ സ്ഥാനാർത്ഥിയായ  മക്കെയ്നെ ഡെമോക്രാറ്റിക് പാർട്ടിയുടെ സ്ഥാനാർത്ഥിയും മുൻ പ്രസിഡന്റുമായ ബറാക്ക് ഒബാമ 173നെതിരെ 365 വോട്ടുകൾക്ക് പരാജയപ്പെടുത്തി.