സൗന്ദര്യത്തിന്റെ അടയാളങ്ങൾ പലർക്കും പലതാണ്. എന്നാൽ പലപ്പോഴും അവയെ എങ്ങനെ സംരക്ഷിണമെന്നും പരിചരിക്കണമെന്നതിനെക്കുറിച്ചും പലർക്കും അറിയില്ല. അൽപ്പമൊന്നു മെനക്കെട്ടാൽ ഈ പ്രശ്നങ്ങളെല്ലാം പരിഹരിക്കാം.
നിറമുള്ള ചുണ്ടുകൾക്ക്
ഒലിവ് ഓയിലും പഞ്ചസാരയും കൂടി മിക്സ് ചെയ്ത് ചുണ്ടുകളിൽ പുരട്ടുക. ഇത് നല്ലൊരു എക്സ്‌ഫോളിയേറ്റർ ആണ്. ഇത് ചുണ്ടുകൾക്ക് നല്ല നിറം നൽകും.
*ദിവസവും എട്ട് ഗ്ലാസ് വെള്ളം കുടിക്കാനും ശ്രദ്ധിക്കുക. ധാരാളം പഴവർഗങ്ങൾ കഴിക്കും .
*ഉറങ്ങുന്നതിന് മുൻപായി വെണ്ണ ചുണ്ടുകളിൽ പുരട്ടുക. വെണ്ണ ഇല്ലെങ്കിൽ പാൽപ്പാട ആയാലും മതി.
* ദിവസവും നാരങ്ങാനീര് ചുണ്ടുകളിൽ പുരട്ടുന്നത് നിറം വർദ്ധിക്കാൻ നല്ലതാണ്.
*ഉണക്കമുന്തിരി ഒരു രാത്രി മുഴുവൻ വെള്ളത്തിലിട്ട് പിറ്റേ ദിവസം രാവിലെ കഴിക്കുന്നത് ചുണ്ടുകൾക്ക് നിറം ലഭിക്കാനും ആരോഗ്യത്തിനും നല്ലതാണ്.
* വെണ്ണയും കുങ്കുമപ്പൂവും ചേർത്ത് ദിവസവും ഉറങ്ങുന്നതിനു മുൻപായി ചുണ്ടുകളിൽ പുരട്ടുക.
*റോസാദളങ്ങളും നെയ്യും അരച്ച് പേസ്റ്റാക്കി ചുണ്ടുകളിൽ പുരട്ടി അരമണിക്കൂർ കഴിഞ്ഞ് കഴുകിക്കളഞ്ഞാൽ ചുണ്ടുകൾ മൃദുവാകുകയും നിറം വയ്ക്കുകയും ചെയ്യും.
*തേൻ, വെള്ളം, ഗ്ലിസറിൻ, ആൽമണ്ട് ഓയിൽ എന്നിവ തുല്യ അളവിലെടുത്ത് മിക്സ് ചെയ്ത് ഒരു ബോട്ടിലിലാക്കി സൂക്ഷിക്കുക. ഇത് ദിവസവും പുരട്ടുന്നത് ചുണ്ടുകളുടെ അഴകിനും ആരോഗ്യത്തിനും ഉത്തമമാണ്.
കറുത്ത നിറം മാറാൻ
പല്ലു തേച്ചതിനു ശേഷം അതേ ടൂത്ത് ബ്രഷ് ഉപയോഗിച്ച് ചുണ്ടുകളും വൃത്തിയാക്കാം. ഇത് ചുണ്ടുകൾ വരണ്ടിരിക്കുന്ന അവസ്ഥ മാറ്റി മൃദുവാകാനും കറുത്ത നിറം മാറാനും സഹായിക്കും. ദിവസവും ഉറങ്ങാൻ പോകുന്നതിനു മുൻപ് ഏതെങ്കിലുമൊരു ലിപ് ബാം ഉപയോഗിക്കുന്നത് ചുണ്ടുകളിലെ കരുവാളിപ്പും മങ്ങലും ഒഴിവാക്കാൻ സഹായിക്കും. ബാലൻസ്ഡ് ഡയറ്റ് ശീലമാക്കുക. വെജിറ്റബിൾസും ഫ്രൂട്ട്സും ധാരാളമായി കഴിക്കാൻ ശീലിക്കുക. ഗ്ലിസറിനും നാരങ്ങാനീരും മിക്സ് ചെയ്ത് ചുണ്ടുകളിൽ പുരട്ടിയാൽ കറുത്ത നിറം മാറിക്കിട്ടും
കാർക്കൂന്തൽ കാന്തിക്ക്
മുടിയുമായി ബന്ധപ്പെട്ട പ്രശ്നങ്ങൾ സുന്ദരികളുടെ ഉറക്കം കെടുത്തുന്നതിൽ മുന്നിലാണ്. അൽപ്പമൊന്ന് സൂക്ഷിച്ചാൽ ഈ തലവേദനയെല്ലാം പരിഹരിക്കാം. മുടിയുടെ നഷ്ടപ്പെട്ട ഭംഗി വീണ്ടെടുക്കാൻ ഏറ്റവും ഉത്തമം ഉലുവയാണ്. അരക്കപ്പ് ഉലുവ തലേ ദിവസം രണ്ട് കപ്പ് വെള്ളത്തിലിട്ടു വയ്ക്കുക. ഇത് പിറ്റേ ദിവസം നന്നായി അരച്ചെടുത്ത് മുടിയിലും തലയോട്ടിയിലും തേച്ചുപിടിപ്പിക്കുക. അര മണിക്കൂറിനുള്ളിൽ കഴുകിക്കളയാം. നല്ലൊരു ഹെയർ മാസ്‌ക് കൂടിയാണിത്.
മുടികൊഴിച്ചിൽ
മുടി കൊഴിച്ചിലിനും ഉലുവയിട്ട വെളിച്ചെണ്ണയാണ് നല്ലത്. അരക്കപ്പ് ഉലുവ 500 മില്ലി ലിറ്റർ വെളിച്ചെണ്ണയിലിട്ട് ഒരു ഗ്ലാസ് ജാറിലാക്കി ഒരാഴ്ചയോളം നേരിട്ടുള്ള സൂര്യപ്രകാശത്തിൽ വച്ച് ചൂടാക്കണം. ഈ എണ്ണ ആഴ്ചയിൽ മൂന്ന് തവണ തലയിൽ തേച്ച് മസാജ് ചെയ്യുന്നത് മുടി കൊഴിച്ചിൽ ഒഴിവാക്കും.
മുടി വളരാൻ വെളിച്ചെണ്ണ
മുടിയുടെ വളർച്ചയ്ക്ക് വെളിച്ചെണ്ണയോളം പോന്ന മറ്റൊന്നില്ല. 500 മില്ലി ലിറ്റർ വെളിച്ചെണ്ണയിൽ ഉണ്ടങ്ങിയ ചെമ്പരത്തിപ്പൂവും ഇലയും ഉണക്ക നെല്ലിക്ക കഷണങ്ങളും കയ്യോന്നിയും ഇട്ട് ചൂടാക്കണം. എണ്ണ തിളയ്ക്കാൻ പാടില്ല. നേരിട്ട് ചൂടാക്കുന്നതിലും നല്ലത് തിളച്ച വെള്ളത്തിനു മുകളിലോ, മറ്റോ ഒരു പാത്രത്തിൽ വച്ച് ചൂടാക്കുന്നതാണ്.
ഓയിൽ മസാജ്
ഹോട്ട് ഓയിൽ മസാജ് കൊണ്ട് മുടിയ്ക്ക് ഏറെ ഗുണങ്ങളുണ്ട്. വരണ്ട, അറ്റം പിളർന്ന മുടിയാണെങ്കിൽ ആഴ്ചയിലൊരിക്കൽ എണ്ണ ചൂടാക്കി മസാജ് ചെയ്യുന്നത് മുടിയുടെ ആരോഗ്യത്തിന് ഉത്തമമാണ്. ഒലിവ് ഓയിൽ, ബദാം ഓയിൽ, വെളിച്ചെണ്ണ എന്നിവയിലേതെങ്കിലും ഉപയോഗിച്ച് മസാജ് ചെയ്യാം. ചെറിയൊരു മസാജ് പോലും തലയോട്ടിയിലെ രക്തയോട്ടം കൂട്ടി നല്ല ഉറക്കം പ്രദാനം ചെയ്യുകയും അതുവഴി ദിവസം മുഴുവൻ റിഫ്രഷായിരിക്കാൻ സഹായിക്കുകയും ചെയ്യും.