ബംഗളൂരു: കാമുകിയുടെ സഹായത്തോടെ സഹപാഠികളുടെ നഗ്നചിത്രങ്ങൾ പകർത്തി പ്രചരിപ്പിച്ച യുവാവ് അറസ്‌റ്റിൽ. ബംഗളൂരുവിലെ എഞ്ചിനീയറിംഗ് വിദ്യാർത്ഥിയായ സിദ്ധാർത്ഥ് എന്ന ഇരുപത്തിയൊന്നുകാരനാണ് പിടിയിലായത്. സംഭവവുമായി ബന്ധപ്പെട്ട് സിദ്ധാർത്ഥിന്റെ കാമുകിയേയും  ചോദ്യം ചെയ്‌ത് വരികയാണ്. സിദ്ധാർത്ഥിന്റെ ആവശ്യപ്രകാരം താനും നഗ്നദൃശ്യങ്ങൾ അയച്ചുകൊടുത്തിട്ടുണ്ടെന്ന് യുവതി പറഞ്ഞു.

ഈ ദൃശ്യങ്ങൾ പുറത്ത് വരാതിരിക്കണമെങ്കിൽ സഹപാഠികളുടെ കുളിമുറി ദൃശ്യങ്ങൾ പകർത്തി നൽകണമെന്ന് സിദ്ധാർത്ഥ് ആവശ്യപ്പെടുകയായിരുന്നു. ഇത് പ്രകാരം സിദ്ധാർത്ഥ് തന്ന രഹസ്യ ക്യാമറ ഉപയോഗിച്ച് മറ്റ് സഹപാഠികളുടെ ദൃശ്യങ്ങൾ പകർത്തുകയായിരുന്നുവെന്ന് യുവതി പൊലീസിനോട് വ്യക്തമാക്കി. ദൃശ്യങ്ങൾ പകർത്താൻ ഉപയോഗിച്ച ഒളിക്യാമറ യുവതിയിൽ നിന്നും പൊലീസ് പിടിച്ചെടുത്തിട്ടുണ്ട്.

വ്യാജ ഫേസ്ബുക്ക് അക്കൗണ്ടുകളിലൂടെയാണ് ഇയാൾ വീഡിയോ പങ്കുവച്ചിരിക്കുന്നത്. ഈ വീഡിയോ വിദ്യാർത്ഥികളിലൊരാൾ കണ്ടതോടെയാണ് സംഭവം പുറത്തറിയുന്നത്. സംഭവത്തിൽ കൂടുതൽ പ്രതികൾ ഉണ്ടോ എന്ന് അന്വേഷിച്ച് വരികയാണെന്ന് പൊലീസ് കൂട്ടിച്ചേർത്തു.