തിരുവനന്തപുരം: സോളാർ കേസിലെ പ്രതി സരിതാ.എസ്.നായരെ കാണാനില്ലെന്ന് പൊലീസ്. കാറ്റാടിയന്ത്രത്തിന്റെ വിതരണാവകാശം നൽകാമെന്ന് വാഗ്‌ദ്ധാനം ചെയ്‌ത് ലക്ഷങ്ങൾ തട്ടിയ കേസിലാണ് വലിയതുറ പൊലീസ് കോടതിയിൽ ഇക്കാര്യം അറിയിച്ചത്. കേസിൽ സരിതയ്‌ക്കെതിരെ കോടതി വാറണ്ട് പുറപ്പെടുവിച്ചിരുന്നു. എന്നാൽ കേസിലെ ഒന്നാം പ്രതിയായ സരിത ഇതുവരെയും കോടതിയിൽ ഹാജരായിട്ടില്ല. തുടർന്ന് വലിയതുറ പൊലീസിനോട് ഇക്കാര്യത്തിൽ അന്വേഷണം നടത്താൻ കോടതി നിർദ്ദേശിക്കുകയായിരുന്നു.

കാട്ടാക്കട സ്വദേശി അശോക് കുമാറിന്റെ സ്ഥാപനത്തിന് കാറ്റാടി യന്ത്രങ്ങളുടെ തിരുവനന്തപുരം ജില്ലയിലെ മൊത്ത വിതരണാവകാശം നൽകാമെന്ന് വാഗ്‌ദ്ധാനം ചെയ്‌ത് നാലരലക്ഷം രൂപ തട്ടിയെന്നാണ് കേസ്. സരിത.എസ്.നായർ, ബിജു രാധാകൃഷ്ണൻ, ഇന്ദിരാദേവി, ഷൈജു സുരേന്ദ്രൻ എന്നിവരാണ് കേസിലെ പ്രതികൾ. ഇവരുടെ ബാങ്ക് അക്കൗണ്ടിൽ രജിസ്ട്രേഷൻ തുകയായി അത്രയും രൂപ യൂണിയൻ ബാങ്ക് ഒഫ് ഇന്ത്യയുടെ ശാഖയിൽ നിക്ഷേപിച്ചുവെന്നാണ് പരാതിക്കാരന്റെ ആരോപണം. എന്നാൽ ഇത്തരത്തിൽ കമ്പനിപോലും ഇല്ലെന്ന് അറിഞ്ഞതോടെ ഇയാൾ പൊലീസിൽ പരാതി നൽകുകയായിരുന്നു. കേസിൽ സരിതാ നായർ നേരിട്ട് ഹാജരാകണമെന്ന് കോടതി നിർദ്ദേശിച്ചെങ്കിലും ഇതുവരെ സരിത ഹാജരായിട്ടില്ല. ഇക്കാര്യത്തിൽ അന്വേഷണം നടത്തിയ പൊലീസ് സംഘം സരിതയെ കാണാനില്ലെന്ന വിചിത്ര റിപ്പോർട്ട് കോടതിയിൽ സമർപ്പിച്ചത് വിവാദങ്ങൾക്ക് ഇടയാക്കിയിട്ടുണ്ട്