റാസൽഖൈമ: ഉറക്കത്തിനിടെ വെപ്പുപല്ല് അബദ്ധത്തിൽ വിഴുങ്ങിയ സ്ത്രീയുടെ ജീവൻ ശസ്ത്രക്രിയ നടത്തി രക്ഷിച്ചു. ഉടൻ ആശുപത്രിയിൽ എത്തിച്ച് ശസ്ത്രക്രിയയിലൂടെ പല്ല് പുറത്തെടുത്തതിനാലാണ് ജീവൻ രക്ഷിക്കാനായത്. യു.എ.ഇയിലെ റാസൽഖൈമയിൽ കഴിഞ്ഞ ദിവസമായിരുന്നു സംഭവം. രാത്രി പല്ല് ഊരിവയ്ക്കാതെ ഉറങ്ങാൻ കിടന്ന് 38കാരിയായ ഫിലിപ്പിനോ സ്ത്രീയുടെ ജീവനാണ് രക്ഷിച്ചത്. രാത്രിയിൽ അസ്വസ്ഥതയും ദാഹവും തോന്നി എഴുന്നേറ്റ് വെള്ളം കുടിച്ചപ്പോഴാണ് പല്ല് വിഴുങ്ങിപ്പോയ കാര്യമറിഞ്ഞതെന്ന് സ്ത്രീ പിന്നീട് പറഞ്ഞു.

ശ്വസിക്കാൻ ബുദ്ധിമുട്ടനുഭവപ്പെട്ടതിനെ തുടർന്ന് ഉടൻ ഇബ്രാഹിം ബിൻ ഹമദ് ഉബൈദുല്ല ആശുപത്രിയിൽ പ്രവേശിപ്പിച്ചു. 15 മിനിറ്റിനുള്ളിൽ നടത്തിയ എൻഡോസ്‌കോപി ശസ്ത്രക്രിയയിലൂടെ കൃത്രിമ പല്ല് പുറത്തെടുത്ത് ജീവൻ രക്ഷിക്കുകയായിരുന്നു. യുവതിയുടെ അന്നനാളത്തിന്റെ മദ്ധ്യഭാഗത്ത് പല്ല് കുടുങ്ങിക്കിടക്കുകയായിരുന്നുവെന്ന് ശസ്ത്രക്രിയക്ക് നേതൃത്വം നൽകിയ ഡോ.മറിയം അൽ ഖത്തരി പറഞ്ഞു.