ഭുവനേശ്വർ: കേരളം നൽകാത്ത ജോലി നീണ്ട നാളത്തെ കാത്തിരിപ്പിനൊടുവിൽ പി.യു ചിത്രയെ തേടിയെത്തി. മുന്ന് തവണ അപേക്ഷിച്ചിട്ടും സംസ്ഥാന സർക്കാർ കനിയാത്ത ജോലി റെയിൽവേയാണ് പി.യു ചിത്രക്ക് നൽകിയത്. ഏഷ്യൻ അത്‌ലറ്റിക് ചാമ്പ്യൻഷിപ്പിലെ സ്വർണനേട്ടത്തിലൂടെയും ഏഷ്യൻ ഗെയിംസിലെ വെങ്കലനേട്ടത്തിലൂടെയും നാടിന്റെ അഭിമാനമായ താരത്തിന് ദക്ഷിണ റെയിൽവേ പാലക്കാട് ഡിവിഷനിൽ സീനിയർ ക്ലർക്കായാണ് നിയമനം. ഇതോടെ നാളെ ഭുവനേശ്വറിൽ ആരംഭിക്കുന്ന ദേശീയ ഓപ്പൺ അത്‌ലറ്റിക്‌സിൽ ചിത്ര റെയിൽവേക്കായി ട്രാക്കിലിറങ്ങും.
കഴിഞ്ഞ വർഷം ചിത്രയ്ക്കു ജോലി നൽകുമെന്നു സംസ്ഥാന സർക്കാർ പ്രഖ്യാപിച്ചിരുന്നതാണ്. ലോക അത്‌ലറ്റിക് ചാമ്പ്യൻഷിപ്പിനുള്ള ടീമിൽ നിന്ന് ചിത്രയെ തഴഞ്ഞത് വിവാദമായതോടെ താരത്തെ ജോലി നൽകി സംരക്ഷിക്കുമെന്നു വീണ്ടും അറിയിച്ചിരുന്നു. കഴിഞ്ഞമാസം ഏഷ്യൻ ഗെയിംസ് മെഡൽനേട്ടത്തിനുശേഷം ജോലിക്കായി ചിത്ര കായികമന്ത്രിക്ക് അപേക്ഷ നൽകിയിരുന്നു. പലതവണ ആവർത്തിക്കപ്പെട്ട ഈ വാഗ്ദ്ധാനങ്ങളെല്ലാം പാഴ്‌വാക്കായതോടെയാണ് റെയിൽവേയിൽ ജോലിക്ക് അപേക്ഷ നൽകിയത്. ഒരുവർഷത്തിലധികം പഴക്കമുള്ള ജോലി വാഗ്ദ്ധാനം കേരളം മറന്നപ്പോൾ കുറഞ്ഞ സമയത്തിനുള്ളിൽ നടപടിക്രമങ്ങൾ പൂർത്തിയാക്കിയ റെയിൽവേ ഇന്നലെ നിയമന ഉത്തരവും പുറത്തിറക്കി.