വാഹനത്തെ ലോകത്തെ ഭാവി താരങ്ങൾ ഇലക്‌ട്രിക് മോഡലുകളാണെന്നതിൽ സംശയമേ വേണ്ട! ഈ രംഗത്ത് വിപ്ളവത്തിന് തിരി കൊളുത്തിയിരിക്കുകയാണ് പ്രമുഖ ജർമ്മൻ ആഡംബര ബ്രാൻഡായ ഔഡി. ഇലക്‌ട്രിക് എസ്.യു.വി ശ്രേണിയിൽ ഔഡി ഒരുക്കിയ ഇ-ട്രോൺ ആഗോള തലത്തിൽ അവതരിപ്പിക്കപ്പെട്ടു കഴിഞ്ഞു. ഔഡിയുടെ ആദ്യ ഇലക്‌ട്രിക് മോഡലാണിത്. അതും എസ്.യു.വി! അമേരിക്കൻ ഇലക്‌ട്രിക് കാർ നിർമ്മാതാക്കളായ ടെസ്‌ലയുടെ ആസ്ഥാനമായ കാലിഫോർണിയയിലാണ് ഔഡി ഇ-ട്രോൺ അവതരിപ്പിച്ചതെന്നത് ഈ രംഗത്ത് വരാനിരിക്കുന്ന കടുത്ത മത്സരത്തിന്റെ വിളിച്ചോതലാണ്. ഇന്ത്യയിൽ അടുത്ത വർഷം മദ്ധ്യത്തോടെ ഔഡി ഇ-ട്രോൺ വിപണിയിലെത്തുമെന്നാണ് സൂചന. യൂറോപ്യൻ നിരത്തുകളിളെ ഈ വർഷം തന്നെ ഇ-ട്രോൺ ആവേശംകൊള്ളിക്കും. 79,000 യൂറോ (ഏകദേശം 67 ലക്ഷം രൂപ) മുതലാണ് ഔഡി ഇ-ട്രോണിന്റെ വില.

ഓരോ ആക്‌സിലിനും കരുത്തേകുന്ന വിധം രണ്ട് ഇലക്‌ട്രിക് മോട്ടറുകൾ ഇ-ട്രോണിലുണ്ട്. ഇവയുടെ സംയുക്ത പവർ ഔട്ട്‌പുട്ട് 265 കിലോവാട്ട്‌സാണ്. അതായത്, ഏകദേശം 360 ബി.എച്ച്.പി. മുന്നിലെ മോട്ടോർ 125 കിലോവാട്ടും പിന്നിലേത് 140 കിലോവോട്ടും കരുത്തുത്‌പാദിപ്പിക്കും. ബാറ്ററി ഒറ്റത്തവണ ഫുൾ ചാർജ് ചെയ്‌താൽ 400 കിലോമീറ്റർ ദൂരം താണ്ടാം. പരമാവധി വേഗം മണിക്കൂറിൽ 200 കിലോമീറ്ററാണ്. പൂജ്യത്തിൽ നിന്ന് 100 കിലോമീറ്റർ വേഗം ഇ-ട്രോൺ 6.6 സെക്കൻഡിൽ കൈവരിക്കും. നോർമൽ മോഡിൽ നിന്ന് ബൂസ്‌റ്ര് മോഡിലേക്ക് കടക്കുമ്പോൾ ഇ-ട്രോണിന് 408 ബി.എച്ച്.പി (300 കിലോവാട്ട്) വരെ കരുത്ത് ലഭിക്കും. 36 മൊഡ്യൂളുകളിലായി 432 സെല്ലുകളാണ് വാഹനത്തിൽ ഇടംപിടിച്ചിരിക്കുന്നത്. ബൂസ്‌റ്ര് മോഡിൽ പൂജ്യത്തിൽ നിന്ന് നൂറ് കിലോമീറ്റർ വേഗം കൈവരിക്കാൻ 5.7 സെക്കൻഡ് മതി.

വിർച്വൽ റിയർ വ്യൂ മിററുകളാണ് ഇ-ട്രോണിന്റെ പ്രധാന സവിശേഷത. കണ്ണാടിക്ക് പകരം കാമറകളാണ് ഇവിടെ ഇടംപിടിച്ചിരിക്കുന്നത്. ഇതിലെ ദൃശ്യങ്ങൾ അകത്തളത്തിലെ സ്‌ക്രീനിൽ കാണാം. അതേസമയം, ഇന്ത്യൻ വിപണിയിൽ സാധാരണ റിയർവ്യൂ മിറർ തന്നെയാകും ഇ-ട്രോണിലുണ്ടാവുക. ഔഡിയുടെ തനത് എസ്.യു.വിക്ക് സമാനമാണ് ഇ-ട്രോണിന്റെയും രൂപകല്‌പന. വാഹനത്തിന്റെ നീളവും വീതിയും ഔഡി ക്യൂ7നെ അനുസ്‌മരിപ്പിക്കുന്നു. പുറംമോടിയിലെയും അകത്തളത്തിലെയും ഫീച്ചറുകൾ എസ്.യു.വിയിലേതു തന്നെ. 660 ലിറ്ററാണ് ബൂട്ട് സ്‌പേസ്. അഞ്ച് പേർക്ക് യാത്ര ചെയ്യാവുന്ന കാറിന്റെ മുൻഭാഗത്ത് ചെറു സാധനങ്ങൾ വയ്‌ക്കാനായി 60 ലിറ്റർ സ്‌റ്രോറേജ് സ്‌പേസുമുണ്ട്.