ഹൈദരാബാദ്: ഇന്ത്യൻ ബാഡ്മിന്റൺ താരങ്ങളായ സൈന നെഹ്‌വാളും (28)​,​ കശ്യപ് (32)​പരുപ്പള്ളി കശ്യപ് എന്ന പി.കശ്യപും വിവാഹിതരാകുന്നു. ഡിസംബർ 16 ഹൈദരാബാദിൽ വച്ച് ലളിതമായ ചടങ്ങുകളോടെ ആയിരിക്കും വിവാഹം. ബന്ധുക്കളും അടുത്ത സുഹൃത്തുക്കളും മാത്രമായിരിക്കും ചടങ്ങിൽ പങ്കെടുക്കുക. ഡിസംബർ 21ന് വിരുന്ന്  സത്കാരം നടത്തും. കഴിഞ്ഞ പത്ത് വർഷമായി ഇരുവരും തമ്മിൽ പ്രണയത്തിലായിരുന്നു. എന്നാൽ പ്രണയത്തിലാണെന്ന കാര്യം അംഗീകരിക്കാനോ നിഷേധിക്കാനോ ഇരുവരും തയ്യാറായിരുന്നില്ല.

2005ൽ പുല്ലേല ഗോപീചന്ദിന്റെ അക്കാ‌ഡമിയിൽ പരിശീലനത്തിനിടെയാണ് ഇരുവരും കൂടുതൽ അടുത്തത്. 2012ലെ ലണ്ടൻ ഒളിന്പിക്സിനിടെ ബന്ധം ശക്തമായി. ഗോൾഡ് കോസ്റ്റിൽ നടന്ന കോമൺവെൽത്ത് ഗെയിംസിൽ ബാഡ്മിന്റൺ സ്വർണം നേടിയതോടെ തന്റെ ജീവിതത്തിൽ കശ്യപിനുള്ള പങ്ക് സൈന പൊതുവേദിയിൽ അംഗീകരിച്ചു. ടൂർണമെന്റിൽ തന്നെ കശ്യപ് എത്രത്തോളം പ്രചോദിപ്പിച്ചു എന്ന് സൈന ആദ്യമായി തുറന്ന് പറഞ്ഞതും അന്നായിരുന്നു. 20014ൽ ഗോപീചന്ദുമായി പിണങ്ങിയതിനെ തുടർന്ന് സൈന ബംഗളൂരുവിൽ വിമൽ കുമാറിന്റെ കീഴിൽ പരിശീലനം ആരംഭിച്ചു. അപ്പോഴും കൃത്യമായ ഇടവേളകളിൽ കശ്യപ് സൈനയെ കാണാൻ ബംഗളൂരുവിൽ എത്തിയിരുന്നു.  കശ്യപുമായി ഒന്നിക്കുന്നതിന് വേണ്ടികൂടിയാണ് സൈന ഹൈദരാബാദിലേക്ക് മടങ്ങിയതെന്നും ഇരുവരോടും അടുത്ത വൃത്തങ്ങൾ സൂചിപ്പിച്ചു.

ഇന്ത്യയ്ക്ക് വേണ്ടി 20 പ്രധാന കിരീടങ്ങൾ നേടിയിട്ടുള്ള സൈന,​ ലോകചാന്പ്യൻഷിപ്പുകളിൽ വെള്ളി,​ വെങ്കല മെഡലുകളും നേടിയിട്ടുണ്ട്. 2014 കോമൺവെൽത്ത് ഗെയിംസിലെ സ്വർണ മെഡൽ ജേതാവാണ് കശ്യപ്.