പൂച്ചകൾ ഓന്തിനെയും പല്ലിയെയും എലിയെയുമൊക്കെ കൊന്ന് വീട്ടിനുള്ളിൽ കൊണ്ടുവരുന്ന പതിവുണ്ട്. ഒരു പക്ഷേ തന്റെ ശൂരത വീട്ടുകാരെ ബോധിപ്പിക്കുന്നതിനാകും ഇത്. എന്നാൽ ഇംഗ്ലണ്ടിലെ ബ്രിസ്റ്റോൾ സ്വദേശിയായ സാംസണിന്റെ പൂച്ച പുറത്ത് കറങ്ങി തിരിച്ചെത്തിയപ്പോൾ കൊണ്ട് വന്നതെന്താണെന്നോ  ? ഒരു കവർ നിറയെ മയക്കുമരുന്ന്. രാവിലെ ഉറക്കമെണീറ്റ ഉടമസ്ഥൻ ആദ്യം  കണ്ടത് ഒരു പ്ലാസ്റ്റിക് കവറാണ്. തുറന്നു നോക്കിയപ്പോൾ അതിനകത്ത് മയക്കുമരുന്നും. മയക്കുമരുന്നുകൾ കണ്ട് ഉടമ  ഞെട്ടി. പിന്നെ വേഗം പൊലീസിനെ അറിയിച്ചു. മയക്കുമരുന്നുകൾ അടങ്ങിയ പ്ലാസ്റ്റിക് കവറിന്റെ ചിത്രവും സംഭവിച്ച കാര്യങ്ങളും പൊലീസ് ട്വിറ്ററിലൂടെ പങ്കുവെച്ചു. അതോടെ  മയക്കുമരുന്ന് പിടിത്തക്കാരൻ പൂച്ച സൂപ്പർഹീറോയായി.

കുറ്റവാളികളെ പിടിക്കാൻ നായ്‌ക്കളെ മാത്രമല്ല പൂച്ചകളേയും ഉപയോഗിക്കരുതോ എന്നാണ്  പലരും ചോദിക്കുന്നത്.  എന്തായാലും മയക്കുമരുന്ന് വേട്ട നടത്തി ഹീറോയായ പൂച്ചയ്ക്കും അതിന്റെ ഉടമസ്ഥനും പൊലീസിന്റെ വക സുരക്ഷയും ഒരുക്കിയിട്ടുണ്ട്.  മയക്കുമരുന്നിന്റെ ഉറവിടം കണ്ടെത്താനാത്തുള്ള തീവ്രശ്രമത്തിലാണ് പൊലീസ്.