ന്യൂഡൽഹി: അന്തരീക്ഷത്തിൽ അപകടകാരികളായ സൂക്ഷ്‌മ കണികകളുടെ അളവ് വർദ്ധിച്ചതിനെ തുടർന്ന് ഡൽഹിയിൽ അന്തരീക്ഷ മലിനീകരണം രൂക്ഷമായി. അടുത്ത ദിവസങ്ങളിൽ മലിനീകരണം കൂടുമെന്നാണ് മലിനീകരണ നിയന്ത്രണ ബോർഡിന്റെ മുന്നറിയിപ്പ്. ദസറ ആഘോഷത്തിന്റെ ഭാഗമായി രാവണന്റെ കോലം കത്തിച്ചതും അയൽ സംസ്ഥാനങ്ങളായ പഞ്ചാബിലും ഹരിയാനയിലും കൊയ്‌ത്തു കഴിഞ്ഞ വയലുകളിൽ തീ കത്തിക്കുന്നതുമാണ് അന്തരീക്ഷ മലിനീകരണം വർദ്ധിപ്പിക്കുന്നത്.

മലിനകാരണമായ പി.എം 2.5, പി.എം 10 കണികളുടെ അളവ് കണക്കാക്കുന്ന എയർ ക്വാളിറ്റി ഇൻഡക്‌സ് പ്രകാരം വടക്കൻ ഡൽഹിയിലെ ജഹാംഗീർപുരിയിൽ എ.ക്യൂ.ഐ 464 രേഖപ്പെടുത്തി. മുൻട്രിക(444), ദ്വാരക(436), ആനന്ദ് വിഹാർ(415) എന്നിവിടങ്ങളിലും മലിനീകരണം രൂക്ഷമായി.

അടുത്ത പത്തു ദിവസം അന്തരീക്ഷം കൂടുതൽ വഷളാകുമെന്നും ജനങ്ങൾ പുറത്തിറങ്ങരുതെന്നും മലിനീകരണ നിയന്ത്രണ ബോർഡ് മുന്നറിയിപ്പ് നൽകിയിട്ടുണ്ട്. സൂക്ഷ്മ കണികകൾ അകത്തു ചെന്നാൽ ശ്വാസ കോശ രോഗങ്ങൾക്ക് വഴിതെളിക്കും.