വൈക്കം: മഹാദേവ ക്ഷേത്രത്തിലെ അഷ്ടമി മഹോത്സവത്തിന്റെ പ്രാരംഭ ചടങ്ങായ പുള്ളി സന്ധ്യാവേല നാളെ ആരംഭിക്കും. ദേവസ്വം ഭാരവാഹികളും ഭക്തജനങ്ങളും വൈക്കത്തപ്പനെ വന്ദിച്ച് ആഘോഷ പൂർവം നടത്തുന്ന ചടങ്ങാണിത്.ആന പുറത്തെഴുന്നള്ളിപ്പ്, മണ്ഡപത്തിൽ വാരമിരിക്കൽ, പ്രാതൽ , അഭിഷേകങ്ങൾ, വിളക്ക് എന്നിവയാണ് ചടങ്ങുകൾ. 15, 17, 19, 21 എന്നീ ദിവസങ്ങളിലായാണ് സന്ധ്യാവേല. തിരുവിതാംകൂർ മഹാരാജാവ് ആലപ്പുഴ, ചേർത്തല തുടങ്ങിയ പ്രദേശങ്ങൾ യുദ്ധം ചെയ്ത് കീഴടക്കിയപ്പോൾ യുദ്ധത്തിൽ മരണമടഞ്ഞ അവകാശികളില്ലാത്ത പടയാളികളുടെ കുടിശിക ശമ്പളത്തിന്റെ പലിശ കൊണ്ട് എല്ലാ വർഷവും ഉത്സവത്തിന് മുൻപ് ഒന്നിടവിട്ട ദിവസങ്ങളിൽ നടത്തുന്നതാണ് പുള്ളി സന്ധ്യാ വേല. ഇത് ഇപ്പോൾ ദേവസ്വം അടിയന്തരമായി നടത്തി വരുന്നു. ഇതിന് ശേഷം മുഖ സന്ധ്യാവേലയും സമൂഹ സന്ധ്യാവേലയും നടക്കും.
നവംബർ 19നാണ് വൈക്കത്തഷ്ടമിക്ക് കൊടികയറുന്നത്. നവംബർ 30 നാണ് അഷ്ടമി. ഡിസംബർ 1ന് ആറാട്ട്.