ഹൈദരാബാദ്: ഭാര്യയുടെ ശകാരത്തെ തുടർന്ന് മനംനൊന്ത് ഭർത്താവ് ആത്മഹത്യ ചെയ്തു. പെൺസുഹൃത്തുമായി തുടർച്ചയായി വാട്സാപ്പിൽ ചാറ്റ് ചെയ്തതിൽ ശകാരിച്ചതിനാണ് യുവാവ് അത്മഹത്യ ചെയ്തത്. ഹൈദരാബാദിലെ സെക്കന്തരാബാദിൽ ശനിയാഴ്ചയായിരുന്നു സംഭവം. ഇലട്രീഷനായിരുന്ന ശിവകുമാർ (27)ആണ് മരിച്ചത്.

ഇയാളുടെ മരണത്തെ തുടർന്ന് പെൺസുഹൃത്തായ വെണ്ണലയും ആത്മഹത്യ ചെയ്തു. വെണ്ണലയുമായി ശിവകുമാർ നിരന്തരം ചാറ്റ് ചെയ്തിരുന്നു. ഇത് ശ്രദ്ധയിൽപ്പെട്ടതോടെ ഭാര്യ ശിവകുമാറിനെ ശകാരിച്ചു. തുടർന്ന് ഇരുവരും തമ്മിലുണ്ടായ വാക്കുതർക്കത്തിനൊടുവിൽ വീടിനുള്ളിൽ ശിവകുമാർ തൂങ്ങിമരിക്കുകയായിരുന്നു.

ശിവകുമാർ മരിച്ച വിവരമറിഞ്ഞ് മനോവിഷമത്തിലായ വെണ്ണല വിഷം കഴിച്ചാണ് ജീവനൊടുക്കിയത്. ഇവരെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ആഗസ്റ്റ് 15 നായിരുന്നു ശിവകുമാറിന്റെ വിവാഹം. വാട്സാപ്പ് ചാറ്റിംഗുമായി ബന്ധപ്പെട്ട് ദമ്പതികൾ തമ്മിൽ നിരന്തരം കലഹച്ചിരുന്നെന്ന് പൊലീസ് അറിയിച്ചു.