വെഞ്ഞാറമൂട്: 14കാരിയായ പട്ടികജാതി പെൺകുട്ടിയെ പീഡിപ്പിച്ച കേസിൽ ജില്ലയിലെ ഒരു രാഷ്ട്രീയ നേതാവിനെ പൊലീസ് തിരയുന്നു.  സി.പി.ഐയുടെ പോഷകസംഘടനയായ പ്രവാസി വെൽഫയർ അസോസിയേഷന്റെ ജില്ലാനേതാവിനെതിരെയാണ് കേസ്. ഇയാൾ ഒളിവിലാണ്.  പെൺകുട്ടിയുടെ മാതാവാണ് വെഞ്ഞാറമൂട്  പൊലീസിന് പരാതി നൽകിയത്. ആറ്റിങ്ങൽ ഡിവൈ.എസ്.പി അനിൽകുമാറാണ് കേസന്വേഷിക്കുന്നത്.

ഏറെനാളുകളായി പീഡനത്തിന് ഇരയാകുന്നതായി സ്‌കൂളിലെ അദ്ധ്യാപകരോട്  കൗൺസിലിംഗിനിടെയാണ് പെൺകുട്ടി വെളിപ്പെടുത്തിയത്. പെൺകുട്ടിയുടെ വീടിനടുത്ത് താമസിക്കുന്ന ഇയാൾ മാതാവ് വീട്ടുജോലികൾക്കായി പുറത്തുപോകുന്ന സമയത്ത് വീട്ടിലെത്തിയായിരുന്നു പീഡിപ്പിച്ചിരുന്നത്. ഇയാൾ നിരന്തരം പെൺകുട്ടിയുടെ വീട് സന്ദർശിച്ചിരുന്നെങ്കിലും അയൽവാസിയായതിനാൽ സമീപവീട്ടുകാർക്ക് സംശയം തോന്നിയിരുന്നില്ല. പോക്‌സോ നിയമപ്രകാരമാണ് ഇയാൾക്കെതിരെ കേസെടുത്തിരിക്കുന്നത്.