തിരുവനന്തപുരം: ഒരിക്കൽ എല്ലാവരേയും ഞെട്ടിച്ച് കൊണ്ട് സോഷ്യൽ മീഡിയയിലൂടെ ബാലഭാസ്കർ ഒരു പ്രഖ്യാപനം നടത്തിയിരുന്നു. ഏറ്റവും അടുത്ത ചങ്ങാതിയുടെ വഞ്ചനയിൽ തകർന്ന് താൻ സംഗീത ജീവിതം അവസാനിപ്പിക്കാൻ പോകുന്നുവെന്ന്. ഫേസ്ബുക്ക് പോസ്റ്റിന് പിന്നാലെ ഒരുപാട് പേർ നേരിട്ട് ബന്ധപ്പെടുകയും തീരുമാനം പിൻവലിക്കണമെന്ന് ആവശ്യപ്പെടുകയും ചെയ്തു. ആളുകൾ തന്നെ ഒരുപാടു സ്നേഹിക്കുന്നുണ്ടെന്നു തിരിച്ചറിഞ്ഞതോടെ തീരുമാനത്തിൽ നിന്നു പിന്മാറുകയാണെന്നു ബാലഭാസ്കർ പിന്നീട് വ്യക്തമാക്കിയിരുന്നു.

അന്ന് ബാലഭാസ്കർ ഫേസ്ബുക്കിൽ കുറിച്ച വാക്കുകൾ ഇങ്ങനെ, ''ജീവിതത്തിൽ എല്ലാവർക്കും മനസാക്ഷി സൂക്ഷിപ്പുകാർ ഉണ്ടായിരിക്കും. എനിക്കും ഉണ്ടായിരുന്നു. എന്റെ എല്ലാ കാര്യങ്ങളും മനസിലാക്കിയ സുഹൃത്ത്. ഞാൻ അയാളുമായി സ്വപ്നങ്ങൾ പങ്കിട്ടു. ജീവിതത്തിലെ സുപ്രധാന തീരുമാനങ്ങൾ എടുത്തതും സുഹൃത്തുക്കളോട് ആലോചിച്ചാണ്. ഒരു ഘട്ടത്തിൽ അടുത്ത സുഹൃത്തിൽ നിന്ന് വഞ്ചനയോടെയുള്ള പെരുമാറ്റമുണ്ടായി. എനിക്കു സ്റ്റേജിൽ നിൽക്കാൻ കഴിയുന്നില്ല. സത്യസന്ധമായ സംഗീതം എന്നിൽ നിന്നു പുറത്തുവന്നില്ല. അത് എന്നോടും എന്നെ സ്നേഹിക്കുന്നവരോടും ചെയ്യുന്ന ചതിയാണ്"".