കലാഭവൻ മണിക്കു പിന്നാലെ മലയാളത്തിലെ അനശ്വര നടൻ തിലകന്റെ ജീവിതവും വെള്ളിത്തിരയിലെത്തുന്നു. വിനയൻ തന്നെയാണ് തിലകന്റെ ജീവിതവും അഭ്രപാളികളിലെത്തിക്കാൻ മുന്നോട്ടു വന്നിരിക്കുന്നത്. ഒരു മാധ്യമത്തിനു നൽകിയ അഭിമുഖത്തിലാണ് വിനയൻ തന്റെ ആഗ്രഹം തുറന്നു പറഞ്ഞിരിക്കുന്നത്. ഒരു ഹോളിവുഡ് സിനിമയ്ക്കാവശ്യമായത്രയും സംഭവ ബഹുലമാണ് തിലകന്റെ ജീവിതമെന്നും അതു തന്റെ കൈയിൽ നിൽക്കുമോയെന്ന് അറിയില്ലെന്നും വിനയൻ കൂട്ടിച്ചേർത്തിരുന്നു.

സെന്തിൽ രാജാമണിയാണ് ചാലക്കുടിക്കാരൻ ചങ്ങാതിയെന്ന ചിത്രത്തിൽ കലാഭവൻ മണിയായി എത്തിയത്. ചിത്രം വിജയകരമായി പ്രദർശനം തുടരുന്നതിനിടെയാണ് തന്റെ പുതിയ ആഗ്രഹത്തെക്കുറിച്ച് വിനയൻ വെളിപ്പെടുത്തിയിരിക്കുന്നത്. കരിയറിന്റെ അവസാനം വരെ മലയാള സിനിമയിൽ വിലക്ക് നേരിട്ട നടനാണ് തിലകൻ. അവഗണന നേരിട്ട താരത്തെ ഒരുകാലത്ത് അവസരങ്ങൾ നൽകി സഹായിച്ച സംവിധായകനാണ് വിനയൻ. ചാലക്കുടിക്കാരൻ ചങ്ങാതി പോലെ മലയാള സിനിമയിലെ പല പുഴുക്കുത്തുകളെയും വിനയൻ തന്റെ ചിത്രത്തിലൂടെ സധൈര്യം തുറന്നു പറയുമെന്ന ആശ്വാസത്തിലാണ് ആരാധകർ.