യാത്രയ്ക്കിടയിൽ അത്യാവശ്യ ഘട്ടങ്ങളിൽ വാഹനം നിർത്തിയിടുമ്പോൾ മാത്രം ഉപയോഗിക്കേണ്ടതാണ് ഹസാർഡ് വാർണിംഗ് ലൈറ്റ് . എന്നാൽ ഇത് ദുരുപയോഗം ചെയ്യുന്ന പ്രവണതയ്‌ക്കെതിരെ യാത്രക്കാരെ ബോധവത്കരിക്കാനെത്തുകയാണ് കേരള ട്രാഫിക് പൊലീസ്. വാഹനത്തിലെ ഹസാർഡ് ലൈറ്റിനെക്കുറിച്ചുള്ള തെറ്റിദ്ധാരണകൾ അപകടമുണ്ടാക്കുമെന്ന മുന്നറിയിപ്പ് പൊലീസ് നൽകുന്നു. വാഹനത്തിലെ ഡാഷ് ബോർഡിലുള്ള ചുവന്ന സ്വിച്ചാണ് ഹസാർഡ് വാർണിംഗ് ലൈറ്റിനെ പ്രവർത്തിപ്പിക്കുന്നത്. ഇത് വഴി വാഹനത്തിലെ 'നാല് ടേണിംഗ് ഇൻഡിക്കേറ്ററുകളും' ഒരുമിച്ച്പ്രവർത്തിപ്പിക്കും.
പുറകെ വരുന്ന വാഹനങ്ങൾക്ക് സൂചന നൽകുന്നതിലേയ്ക്കാണ് ഹസാർഡ് വാർണിംഗ് ലൈറ്റ് ഉപയോഗിക്കേണ്ടത്. എന്നാൽ ലൈൻ മാറ്റം, തിരിവുകൾ തുടങ്ങിയ മറ്റ് അവസരങ്ങളിൽ ഈ സിഗ്നൽ ഉപയോഗിക്കുന്നത് പുറകെ വരുന്ന വാഹനങ്ങളിലെ ഡ്രൈവർമാർക്ക് ആശയക്കുഴപ്പമുണ്ടാക്കുമെന്ന മുന്നറിയിപ്പ് പൊലീസ് നൽകുന്നു. പല റോഡുകൾ ചേരുന്ന ജംഗ്ഷനുകളിൽ നേരെ പോകുന്നതിലേക്കായി ഹസാർഡ് വാർണിംഗ് ലൈറ്റ് ഉപയോഗിക്കുന്ന പ്രവണത നിർത്തണമെന്നും ഫേസ്ബുക്ക് പോസ്റ്റിലൂടെ കേരള ട്രാഫിക് പൊലീസ് അഭ്യർത്ഥിക്കുന്നു.
ഫേസ്ബുക്ക് പോസ്റ്റിൻെറ പൂർണരൂപം
വാഹനത്തിലെ ഹസാർഡ് ലൈറ്റിനെക്കുറിച്ചുള്ള തെറ്റിദ്ധാരണകൾ അപകടമുണ്ടാക്കും
നമ്മുടെ പൊതുനിരത്തുകളിൽ കണ്ടുവരുന്ന തെറ്റിദ്ധാരണയുണ്ടാക്കുന്ന പ്രവണതയാണ് ഹസാർഡ് വാർണിംഗ് ലൈറ്റിൻ്റെ ദുരുപയോഗം.
ഹസാർഡ് വാർണിംഗ് ലൈറ്റ് എന്നാൽ : വാഹനത്തിലുള്ള "നാല് ടേർണിംഗ് ഇൻഡിക്കേറ്ററുകളും" ഒരുമിച്ച്‌ പ്രവര്‍ത്തിപ്പിക്കുന്നതിനെയാണ് ഹസാര്‍ഡ് വാർണിംഗ് ലൈറ്റ് എന്ന് പറയുന്നത്. വാഹനത്തിലെ ഡാഷ് ബോര്‍ഡിലുള്ള ചുവന്ന സ്വിച്ച്‌ (Triangle symbol) ആണ് ഹസാര്‍ഡ് വാർണിംഗ് ലൈറ്റിനെ പ്രവര്‍ത്തിപ്പിക്കുന്നത്.
യാത്രയ്ക്കിടെ 'റോഡിൽ വാഹനം നിര്‍ത്തേണ്ട അടിയന്തര സാഹചര്യമുണ്ടായാൽ മാത്രം' പുറകെ വരുന്ന വാഹനങ്ങൾക്ക് സൂചന നല്കുന്നതിലേയ്ക്കാണ് ഹസാര്‍ഡ് വാർണിംഗ് ലൈറ്റ് ഉപയോഗിക്കേണ്ടത്. ലൈൻ മാറ്റം, തിരിവുകൾ തുടങ്ങിയ മറ്റ് അവസരങ്ങളിൽ ഈ സിഗ്നൽ ഉപയോഗിക്കുന്നത് പുറകെ വരുന്ന വാഹനങ്ങളിലെ ഡ്രൈവർമാർക്ക് ആശയക്കുഴപ്പമുണ്ടാക്കും. പല റോഡുകൾ ചേരുന്ന ജംഗ്ഷനുകളിൽ നേരെ പോകുന്നതിലേക്കായി ഹസാർഡ് വാർണിംഗ് ലൈറ്റ് ഉപയോഗിക്കരുത് എന്ന് സാരം.
അതുപോലെ നിരത്തുകളിൽ ഹസാർഡ് വാർണിംഗ് ലൈറ്റ് പ്രവർത്തിപ്പിച്ച വാഹനത്തെ കണ്ടാൽ അത് നിർത്തിയിട്ടിരിക്കുകയാണെന്ന് മനസിലാക്കി വേണ്ട മുൻകരുതലുകൾ സ്വീകരിക്കുക.