നീണ്ട ഇടവേളയ്ക്കു ശേഷം ഫഹദ് ഫാസിലിന്റെ നായികയായി നസ്രിയ നസീം വീണ്ടുമെത്തുകയാണ്. അൻവർ റഷീദ് സംവിധാനം ചെയ്യുന്ന ട്രാൻസ് എന്ന ചിത്രത്തിലാണ് ഫഹദിന്റെ നായികയായി താരം എത്തുന്നത്. വിവാഹത്തോടെ അഭിനയ രംഗത്തു നിന്ന് മാറി നിന്ന നസ്രിയ അഞ്ജലി മേനോൻ സംവിധാനം ചെയ്ത കൂടെയിലൂടെയാണ് തിരികെ വന്നത്. ചിത്രത്തിൽ പൃഥ്വിരാജിന്റെ സഹോദരിയായാണ് നസ്രിയ അഭിനയിച്ചത്. വാർത്തകൾ യാഥാർത്ഥ്യമായാൽ തിരിച്ചുവരവിൽ നായികയാകുന്ന ചിത്രം കൂടിയാണ് ട്രാൻസ്. ഒരഭിമുഖത്തിൽ അവളെ എന്റെ അടുത്ത ചിത്രത്തിൽ കാണാം എന്ന് ഫഹദ് പറഞ്ഞിരുന്നു. താരത്തിന്റെ അടുത്ത ചിത്രം ട്രാൻസാണ്. അതുകൊണ്ടാണ് ഇരുവരും ട്രാൻസിൽ ഒന്നിച്ചെത്തുമെന്ന് ആരാധകർ കാത്തിരിക്കുന്നതും.

ആറു വർഷത്തെ ഇടവേളയ്ക്കു ശേഷം അൻവർ റഷീദ് ഒരുക്കുന്ന ചിത്രമെന്ന നിലയിൽ ട്രാൻസ് ശ്രദ്ധനേടിയിരുന്നു. വിൻസന്റ് വടക്കനാണ് ചിത്രത്തിന് തിരക്കഥയൊരുക്കുന്നത്. സൗബിൻ ഷാഹിർ, ചെമ്പൻ വിനോദ്, വിനായകൻ, ദിലീഷ് പോത്തൻ, ശ്രീനാഥ് ഭാസി എന്നിവരും പ്രധാന വേഷങ്ങളിലെത്തുന്നുണ്ട്. അൻവർ റഷീദ് എന്റർടെയ്ൻമെന്റ്സ് നിർമ്മിക്കുന്ന ചിത്രം അടുത്ത വർഷം മാർച്ചിൽ തിയേറ്ററുകളിലെത്തും. സത്യൻ അന്തിക്കാട് ചിത്രമായ ഞാൻ പ്രകാശന്റെ ചിത്രീകരണം പൂർത്തിയാക്കിയ ശേഷമാകും ഫഹദ് ട്രാൻസിൽ ജോയിൻ ചെയ്യുക.