തിരുവനന്തപുരം: ബ്രൂവറി വിഷയത്തിൽ എക്‌സൈസിന്റെ പേരിൽ പുറത്തിറങ്ങിയ പത്രക്കുറിപ്പിനെക്കുറിച്ച് അന്വേഷിക്കണമെന്നാവശ്യപ്പെട്ട് എക്‌സൈസ് അഡിഷണൽ ചീഫ് സെക്രട്ടറി ആശാ തോമസ് ആഭ്യന്തരവകുപ്പിന് കത്ത് നൽകി. പത്രക്കുറിപ്പ് ഇറങ്ങിയത് തന്റെ അറിവോ അനുമതിയോ ഇല്ലാതെയാണെന്നും ഇതേക്കുറിച്ച് അന്വേഷിക്കണമെന്നുമാണ് ആശാ തോമസ് ആവശ്യപ്പെട്ടിരിക്കുന്നത്. ഇതേക്കുറുച്ച് വകുപ്പുതല അന്വേഷണത്തിന് എക്‌സൈസ് ഡെപ്യൂട്ടി സെക്രട്ടറിയെയും അവർ ചുമതലപ്പെടുത്തി.
ബ്രൂവറികൾക്ക് അനുമതി നൽകിയതിനെ തുടർന്ന് പ്രതിപക്ഷ നേതാവ് രമേശ് ചെന്നിത്തല സർക്കാരിനെതിരെ ആരോപണം ഉന്നയിച്ചിരുന്നു. ഈ അഴിമതി ആരോപണത്തിനുള്ള മറുപടിയായാണ് എക്‌സൈസ് വകുപ്പിന്റെ പേരിൽ പത്രക്കുറിപ്പ് ഇറങ്ങിയത്. ഇതിനെതിരെ ചെന്നിത്തല്ല തന്നെ രംഗത്ത് വന്നു. ബ്രൂവറി അനുമതിയെ കുറിച്ച് വിശദീകരിക്കണമെന്ന് താൻ എക്‌സൈസ് മന്ത്രിയോടാണ് ആവശ്യപ്പെട്ടതെന്നും എന്നാൽ, വാർത്താക്കുറിപ്പിറക്കി എക്‌സൈസ് വകുപ്പിലെ ഉദ്യോഗസ്ഥരെ കൊണ്ട് തനിക്ക് മറുപടി നൽകിയത് തന്നെ അപമാനിക്കലാണെന്നും ചെന്നിത്തല വ്യക്തമാക്കി. തുടർന്ന് പ്രതിപക്ഷ നേതാവിനെ അപമാനിച്ചതായി കാട്ടി അഡീ. ചീഫ് സെക്രട്ടറി ആശാ തോമസിനെതിരെ കോൺഗ്രസ് പാർലമെന്ററി പാർട്ടി ഉപനേതാവ്‌ കെ.സി. ജോസഫ് എം.എൽ.എ അവകാശലംഘനത്തിന് സ്‌പീക്കർക്ക് നോട്ടിസും നൽകി.