ഡാലസ്: നോർത്ത് അമേരിക്കയുടെ ചരിത്രത്തിൽ ആദ്യമായി ശ്രീനാരായണ ധർമ്മ സംഘം ട്രസ്റ്റ് ശിവഗിരി മഠത്തിന്റെ നേരിട്ടുള്ള നിയന്ത്രണത്തിൽ നിർമിക്കന്ന ആശ്രമ സമുച്ചയത്തിന്റെ ഭൂമി പൂജ നടത്തി. ഡലസ് നഗരത്തിന് സമീപമുള്ള ഗ്രാൻഡ് പ്രയറിയിലെ ആശ്രമ ഭൂമിയിൽ മഹാഗുരുപൂജയോടെ നടത്തിയ പൂജയ്ക്ക് ധർമസംഘം ട്രസ്റ്റ് എക്സിക്യൂട്ടീവ് ബോർഡ് അംഗം സ്വാമി ഗുരുപ്രസാദ് മുഖ്യകാർമികത്വം വഹിച്ചു.
ഡാളസ് ഫോർട്ട്‌വർത്ത് മെട്രോപ്ലെക്സിൽ നിന്നും സമീപ സ്ഥലങ്ങളിൽനിന്നും എത്തിച്ചേർന്ന ഗുരുഭക്തരെ കൂടാതെ ന്യൂയോർക്ക്, ഫിലാഡെൽഫിയ, വാഷിംഗ്ടൺ, അരിസോണ, കാലിഫോർണിയ, ഷിക്കാഗോ തുടങ്ങിയ നഗരങ്ങളിൽ നിന്നുള്ള പ്രതിനിധികളും ചടങ്ങിൽ പങ്കെടുത്തു. പങ്കടുത്തിരുന്നു .
ജാതിയുടെയും, മതത്തിന്റെയും വർണ്ണത്തിന്റെയും പേരിൽ ദിനം തോറും കലുഷിതമായിക്കൊണ്ടിരിക്കുന്ന ഈ ലോകത്തിനു ഭഗവാൻ ശ്രീ നാരായണ ഗുരദേവന്റെ ഏക ലോക ദർശനങ്ങൾ ജാതി മത ഭാഷാ വ്യത്യാസങ്ങൾ ഇല്ലാതെ എല്ലാവര്ക്കും പകർന്നു കൊടുക്കുകയും, ഗുരുദർശനത്തിൽ അധിഷ്ഠിതമായ ഒരു തലമുറയെ വാർത്തെടുക്കുകയും ചെയ്യേണ്ടത് ഈ കാലഘട്ടത്തിന്റെ ആവശ്യമാണെന്നും അതിനു വേണ്ടി സ്ഥാപിക്കപ്പെടുന്ന ഈ ആശ്രമ സമുച്ചയം ശിവഗിരിയുടെ ചരിത്രത്തിലെ ഒരു നാഴികക്കല്ലാണെന്നും സ്വാമി ഗുരു പ്രസാദ് പറഞ്ഞു.
ചടങ്ങിൽ ഫോമ പ്രസിഡന്റ് ശ്രീ. ഫിലിപ്പ് (രാജു ) ചാമത്തിൽ , ശ്രീഗുരുവായൂരപ്പൻ ടെംപിൾ പ്രസിഡന്റ് രാമചന്ദ്രൻ നായർ, കെ എച്ച്.എൻ.എ മുൻ പ്രസിഡന്റ് റ്റി.എൻ നായർ, വേൾഡ് മലയാളി ഗ്ലോബൽ പ്രസിഡന്റ് ഗോപാലപിള്ള തുടങ്ങിയവർ ആശംസകൾ നേർന്നു.