കൊച്ചി: നടപ്പു സാമ്പത്തിക വർഷത്തെ രണ്ടാംപാദമായ ജൂലായ് - സെപ്‌തംബറിൽ ഫെഡറൽ ബാങ്ക് 0.9 ശതമാനം വർദ്ധനയോടെ 266.04 കോടി രൂപയുടെ ലാഭം രേഖപ്പെടുത്തി. മുൻ വർഷത്തെ സമാനപാദത്തിൽ ലാഭം 264 കോടി രൂപയായിരുന്നു. പ്രവർത്തനലാഭം 19.62 ശതമാനം വർദ്ധിച്ച് 697.60 കോടി രൂപയായി. മൊത്തം വരുമാനം 3,087.81 കോടി രൂപയാണ്. വർദ്ധന 15.79 ശതമാനം.

മൊത്തം ബിസിനസ് 23.38 ശതമാനം ഉയർന്ന് 2.20 ലക്ഷം കോടി രൂപയായി. ആകെ നിക്ഷേപം 1.18 ലക്ഷം കോടി രൂപയായും വായ്‌പകൾ 1.02 ലക്ഷം കോടി രൂപയായും ഉയർന്നു. എൻ.ആർ.ഐ നിക്ഷേപം 22.30 ശതമാനം വർദ്ധിച്ച് 46,787.05 കോടി രൂപയിലെത്തി. ചെറുകിട വായ്‌‌പകൾ 20.96 ശതമാനവും കോർപ്പറേറ്ര് വായ്‌പകൾ 29.47 ശതമാനവും വർദ്ധിച്ചു. 34.74 ശതമാനമാണ് ഭവന വായ്‌പയിലെ വർദ്ധന. മൊത്തം നിഷ്‌ക്രിയ ആസ്‌തി മൂന്ന് ശതമാനത്തിൽ നിന്ന് 3.11 ശതമാനത്തിലേക്ക് ഉയർന്നു. 1.78 ശതമാനമാണ് അറ്റ നിഷ്‌ക്രിയ ആസ്‌തി.